Варкшоп для беларускіх дакументалістаў

  • 04.12.2017
  • Аўтар: 34mag
  • 1021 0

15-16 снежня «Паўночнае ззянне Doc Hub» ладзіць варкшоп для беларускіх дакументалістаў. Распавядаем, што гэта, навошта ісці і каму падзея будзе цікавая.

 

Што?

Варкшоп «Першая дапамога дакументальнаму кіно: пітчынгі, фонды, грошы»

Цягам двух дзён удзельнікі даведаюцца, дзе браць грошы на свае фільмы, як будаваць удалы пітчынг і фестывальную стратэгію. Таксама ты зможаш запітчыць свой праект перад замежнымі ментарамі, атрымаць ад іх парады і дапрацаваць свой пітч да стану, калі на яго неадкладна ўсім захочацца даць грошай.

 

Дзе?

Галерэя «Арт-Беларусь» (вул. Казлова, 3), факультэт экранных мастацтваў БДАМ (вул. Чычэрына, 1)

 

Калі?

15–16 снежня (пятніца, субота)

 

 

У першы дзень 15 снежня адбудзецца тэарэтычная частка з лекцыямі на тэмы:

«Як фінансаваць фільм». Распавядзе Эва Брадзджанітэ, літоўская прадстаўніца Creative Europe MEDIA, якая падтрымлівае еўрапейскія
праекты ў галіне аўдыявізуальнай культуры.

«Кейс-стадзі фільма Віталя Манскага “Родныя”». Гунціс Трэктэрыс, латвійскі прадзюсар 26 дакументальных стужак, распавядзе пра фестывальную стратэгію і прасоўванне фільма.

«Уводзіны ў тэхніку пітчу і магчымасці капрадукцыі ў краінах Паўночнай Еўропы». Сесілія Лідзін, упаўнаважаная па дакументальным кіно Дацкага інстытута кіно, якая мае больш за 20 гадоў вопыту ў фінансаванні і вытворчасці дакументальных стужак, прачытаю гэтую лекцыю.

На другі дзень будзеш пітчыць праекты, дапільваць іх на месцы пад кіраўніцтвам ментараў і зноў пітчыць. Аўтар лепшага праекта атрымае акрэдытацыю і паездку на фестываль DocPoint Tallinn 2018.

 

Воля Чайкоўская, дырэктарка «Паўночнага ззяння:

– У Беларусі шмат адукацыйных мерапрыемстваў, а пра кіно – амаль не бывае. Кінаіндустрыя ў нас мала развітая. І любая актыўнасць – добры стымул для таго, каб нешта пачало змяняцца ў добры бок.

Варкшоп будзе цікавы рэжысёрам, прадзюсарам, кінааматарам, журналістам, кінакрытыкам – усім, хто нейкім чынам задзейнічаны ў кінапрацэсе ці хацеў(-ла) быць задзейнічаны(-ая).

Можа быць, прыйдзе час, і ў Беларусі пітчынгі на фінансаванне кінапраектаў таксама будуць адкрытымі і празрыстымі, і тады гэтыя веды вельмі спатрэбяцца нашым фільммэйкерам.

 

 

 

Падавацца могуць аўтары дакументальных праектаў любой стадыі распрацоўкі (development, production, post-production) і любой працягласці (кароткі і поўны метр). Удзел у мерапрыемстве бясплатны, але колькасць месцаў абмежаваная.

Для падачы неабходна запоўніць анкету. Дэдлайн – 8 снежня. 

Прыйсці проста паслухаць таксама можна, толькі зарэгіструйся. Дэдлайн для слухачоў – 14 снежня. Больш падрабязнасцяў тут.

 


КАМЕНТАРЫ (0)

КАМЕНТАВАЦЬ