Чым замяніць навагодні карпарат?

  • 19.12.2019
  • Аўтар: 34mag
  • 2762

Святы кродуться как мыш, а калядны настрой быццам стырыў Грынч? Годзе гнісці. Прапануем закінуць у сябе яшчэ кілаграмчык мараканскіх мандарынаў і выбраць пераднавагоднюю вечарыну на свой густ.

 

«НОВЫ .XYZ»

 Калі:  28 снежня, 23:00.

 Дзе:  клуб Berlin (пер. Тучынскі, 2).

 Колькі:  10 BYN – загадзя, 15 BYN – на ўваходзе.

Прастора «Сталоўка .XYZ» выдатная не толькі лютым холадам і флэшбэкамі з саўка, у якім ты ніколі і не жыў(-ла), але і арт-варушняком, што вакол яе бурліць. За тры гады існавання «Сталоўка» аб'яднала 10 супольнасцяў, рэалізавала 9 выставачных праектаў і правяла аж 250 мерапрыемстваў. Напярэдадні новага, 2020-га стваральнікі_цы праекта запрашаюць цябе на прэзентацыю анлайн-архіва «Сталоўка XYZ: Супольнасці, Прасторы, Камунікацыя» і вечарыну з дыджыкамі з Беларусі і Украіны. Тусоўка пройдзе не на Фабрыцыуса, а ў клубе Berlin.

ACCIDENTAL POINT

 Калі:  28 снежня, 18:00.

 Дзе:  accidental POINT (вул. Кальварийская, 21).

 Колькі:  free.

Праведай новую кропку на мапе альтэрнатыўнага Менска: аб'яднанне Accidental society адкрывае бар з вінілам і музыкай. Самая цукерка: тут усталююць адзіную ў СНД кастомную сістэму TPI Sound: гэты вытворца робіць аўдыясістэмы для брытанскай студыі гуказапісу BBC News і канцэртных выступаў The Chemical Brothers. У праграме першай вечарынкі на новым месцы – дыджэй-сэты ад рэзідэнтаў супольнасці і некалькіх гасцей, а таксама прэза кнігі пра ўзаемасувязь рэйву і падзення Берлінскай сцяны. Прэзентаваць кніжку будзе галоўрэд «Mixmag Расія» Ілля Варонін, за вяртушкі стануць NSNVA, KorneJ, Gleb Gurami, 3 а, Ilya Koronez.

 

EVAN BAGGS У «ХУЛІГАНЕ»

 Калі:  28 снежня, 23:59.

 Дзе:  бар «Хуліган» (вул. Кастрычніцкая, 16).

 Колькі:  10 BYN.

У «Хуліган» пад самую ёлку вязуць нью-ёркца па нараджэнні і берлінца па базаванні Эвана Бэгса. Гэты хлопец валодае магічнай здольнасцю знаходзіць дзівосныя плыткі на стыку тэхна, хаўсу, электра, брэйксу і зачароўвае публіку марафонскімі сэтамі. Арганізатары тусы запэўніваюць, што сэты Бэгса здольныя мяняць свядомасць. Вось і праверыш.

«БАСОТА ЦЁМНАЯ»

 Калі:  24 снежня, 23:00.

 Дзе:  клуб Berlin (пер. Тучынскі, 2).

 Колькі:  10 BYN.

Тут табе ні разумных прэзентацый, ні дзівосных аўдыясістэм, ні еўрапейскіх прывозаў. «Басота» проста запрашае цябе нармальна растрэсціся пад дабстэп у кампаніі юных і жвавых. «“Цёмная” працуе лепш любога псіхатэрапеўта, прачышчаючы галаву і выганяючы ўсю дуроту сваёй аўрай і зарадам эмоцый ад шчыльнай цёмнай атмасферы. Гэта менавіта тая туса, на якой ты можаш застацца сам-насам з самім сабой, але ў той жа час знаходзіцца ў коле вялікай колькасці людзей», – кажа адзін з галоўных дзейных асоб вечара Maklai.

КАЛЯДНЫ ФЭСТ

 Калі:  25 снежня, 17:30.

 Дзе:  клуб Re:Public (вул. Прытыцкага, 62).

 Колькі:  ад 15 BYN.

Алды тут? «Калядны фэст» – добрая нагода сабрацца разам і патрэсці даўгімі валасамі ўволю. Ствараць калядны настрой будуць ВІА сярэднявечнай і фальклорнай музыкі, прычым «Стары Ольса» адзначыць 20 гадоў творчага шляху. Пішуць, што «канцэптуальна гэты фестываль не будзе асабліва адрознівацца ад папярэдніх». Яно і да лепшага.

 

НЯДЗЕЛЯ КОРПУС ПЛАТО

 Калі:  22 снежня, 19:00–23:00.

 Дзе:  культ. цэнтр «Корпус» (пр-т Машэрава, 9).

 Колькі:  free.

У нядзелю перад Калядамі культ. цэнтр «Корпус» ператворыцца ў «прастору для ўяўлення, сацыяльны клуб і рэлакс-рум». Гэта мерапрыемства з разраду «стары сябар даражэйшы за новых двух»: правераная прастора; дыджэі, густы якіх ты ведаеш – і давяраеш ім; яшчэ адна магчымасць сустрэцца са знаёмцамі, патанчыць, выпіць і пагаварыць, не перакрыкваючы музло. Ну і котка Хімера, якая глядзіць на цябе так, быццам ведае тваю будучыню.

«ТАЙНЫ САНТА. СІЦІ ЭДІШЕН»

 Калі:  29 снежня, 18:00.

 Дзе:  бар «Алкаголі» (вул. Інтэрнацыянальная, 13)

 Колькі:  free.

Тут не танцы, але ў якасці бонусу мы не можам пакінуць цябе без якога-небудзь бессэнсоўнага падарунка. Прыемны бар «Алкаголі» прыдумаў вынесці за межы офісаў і працоўных калектываў гульню ў таемнага Санту. Схема такая: да 22 снежня рэгіструешся тут, а 29 снежня прыходзіш на раздачу.