Ілюстратарка Надзя Макеева запусціла часопіс пра сучарт

Надзя Макеева, беларуская мастачка, чые працы ты дакладна бачыў(-ла) хоць бы ў выглядзе вокладак «Кассиопеи» і «Петли пристрастия», запусціла новы праект Chrysalis Mag.

Гэта часопіс пра сучаснае беларускае мастацтва, галоўная мэта – асвятліць і звярнуць увагу чытачоў на лакальных аўтараў і аўтарак, якія не атрымліваюць дастатковай увагі ў гарадскіх медыя. Разам з Надзяй у каманду Chrysalis уваходзяць мастацтвазнаўца Павел Дарохін і дызайнер Валодзя Горз.

На дадзеным этапе Chrysalis хутчэй выглядае як каталог-агрэгатар, што проста збірае ў адным месцы працы, якія зацаніла рэдакцыя. Але ў планах часопіса ўжо ёсць пашырэнне фармату выдання – будзем сачыць і табе раім.

Пераходзь на сайт Chrysalis, заадно можна падпісацца і на іх інстаграм.

Надзя Макеева:

«У бліжэйшы час будзем чымсьці накшталт каталога. Але з часам плануем пашырыць фармат. Аўтараў і іх работы выбіраем зыходзячы з асабістых пераваг каманды. Мне вельмі падабаецца фармат такіх часопісаў, як Hi-Fructose і Beautiful Bizarre, – у ідэале хацелася б выглядаць гэтак жа».