13 падказак тым, хто рыхтуе анлайн-івэнт
- 24.08.2023
- 1845
Шмат якія актыўнасці з ковідам і пасля яго сышлі ў анлайн, але не ўсе з іх праходзяць аднолькава карысна ды бяспечна для ўдзельніц і ўдзельнікаў. Нядаўна ў падкасце «Трэба спрабаваць» менеджарка адукацыйных ініцыятыў Вера і сулідар:ка менскага сяброўства «тендер на гендер» Тоні Лашдэн давалі практычныя парады тым, хто рыхтуе мерапрыемства анлайн. Публікуем канспект выпуску для тых, хто больш чытае, чым слухае.
1 / Не варта абмяжоўваць палёт думкі класічнымі вэбінарамі. Фарматаў анлайн-івэнтаў дастаткова: варкшопы, прамыя эфіры, марафоны, квізы, хатнія вечарынкі і чаго толькі яшчэ не бывае. Шукай свой мэтч.
2 / Над канцэпцыяй анлайн-івэнту можна працаваць як рэкламшчыкі працуюць над брэндам. Якіх людзей івэнт (твой «брэнд») зацікавіць? Якія праблемы дапаможа ім вырашыць? Што можа перашкодзіць патэнцыйным удзельнікам(-цам) дайсці да івэнту ці атрымаць ад яго карысць? Як падвысіць каштоўнасць мерапрыемства? Ці можаце вы з камандай залучыць экспертак і экспертаў?
3 / Трэба прадумаць увесь шлях, які маюць прайсці ўдзельніцы і ўдзельнікі. Якім чынам чалавек «увойдзе» ў мерапрыемства? Што будзе адбывацца з ім «унутры»? І як чалавек «выйдзе»? Калі камандзе івэнту ўвесь шлях зразумелы, ёй прасцей размеркаваць ролі, якія возьме на сабе кожная і кожны.
4 / Не ўскладняй форму рэгістрацыі на мерапрыемства. Бясконцыя палі, якія трэба запоўніць, могуць адштурхнуць аўдыторыю. Таксама важна патлумачыць, навошта вам тая ці іншая інфармацыя і як вы плануеце яе захоўваць.
5 / Каб «адфільтраваць» людзей, якія могуць зрабіць анлайн-прастору небяспечнай, часам дастаткова спасылкі на актыўную сацсетку чалавека. Але май на ўвазе, што не ўсе людзі вядуць сацсеткі, а выключаць кагосьці па гэтым прынцыпе – рашэнне не супер.
6 / Адэкватна супастаўляй рэальнасць і свае чаканні наконт таго, як людзі будуць карыстацца інструментамі, якія ты ім прапануеш. Напрыклад, калі івэнт плануецца на летнія выходныя, цалкам верагодна, што людзі будуць падлучацца з тэлефона на лецішчы і не змогуць карыстацца дэсктопнымі праграмамі.
7 / Калі плануецца інтэрактыў, трэба праінфармаваць пра тое загадзя. Калі плануецца выкарыстанне нейкіх адмысловых мабільных праграм – таксама.
8 / Арганізатары мерапрыемства павінны разумець, хто за што адказвае і хто ў каго на падхопе ў выпадку, калі нешта пойдзе не па плане.
9 / На старце мерапрыемства важна агучыць агульныя правілы камунікацыі. Напрыклад: «хочаш нешта сказаць – спачатку падымі руку» ці «можна ўмыкнуць мікрафон, калі іншы спікер(-ка) ужо вымкнуў(-ла) свой».
10 / Зусім не лішне акрэсліць каштоўнасныя рамкі. Напрыклад, пазначыць, што ў вас на івэнце паважаюць кожнае меркаванне і досвед кожнай і кожнага. Калі нечыя межы будуць парушацца, на гэта трэба рэагаваць адразу. Ва ўразлівых топіках мадэрацыя павінна працаваць асабліва пільна.
11 / Каб зняць напружанне чорных акенцаў, можна папрасіць удзельнікаў і ўдзельніц паказацца хаця б у пачатку (калі ў іх гэта, вядома, атрымліваецца). Звычайна людзі не ўмыкаюць камеру без злога намеру, проста ім так камфортней.
12 / Пасля агучанага пытання выступоўцу варта пакідаць час на пісьмовую рэакцыю. Многія людзі аддаюць перавагу не казаць нешта голасам, а пісаць у чат.
13 / Важна прадумаць фармат follow-up і не забываць дасылаць людзям тое, што абяцалі даслаць пасля мерапрыемства: напрыклад, дадатковыя матэрыялы.
Падрабязней пра тое, як правесці эфектыўнае і бяспечнае мерапрыемства, а таксама пра тое, якія фарматы цяпер лепш за іншыя заходзяць у Беларусі, – слухай у пятым эпізодзе падкасту «Трэба спрабаваць»:
Apple Podcasts / Spotify / Soundcloud / Castbox /
/ Google Podcasts / Yandex.Music / YouTube