Маяк Без Билета

Віталь Артыст – песні, вакал, sound production 

Арцемі Даронкін – бас, ханг-драм, бэк-вакал, аранжыроўка 

Уладзімір Развадоўскі – клавішныя, хор, sound production 

Аляксандр Івашкевіч – гітары, хор

 Ягор Даронкін – ударныя, хор

Таня Кушнер – тэксты, вакал, sound production 

Кірыл Rusted Барысаў – sound production (6, 9) 

Вытворчасць Spinning Studio, 2018 

Прадзюсары – Міхаіл Бычанок, Таня Кушнер 

Дызайн вокладкі – Дзіма Ску 

– Гэты альбом з'явіўся на свет не ад таго, што мы, як належыць, назбіралі ўнікальнага вопыту, накаталі натхнёных чарнавікоў, выседзелі іх доўгімі вечарамі, пераварыўшы ўсе атрыманыя ўражанні за гады, якія прайшлі з моманту папярэдняга рэлізу. Мы наогул нікуды не спяшаліся, маглі і яшчэ чатыры гады збіраць свае пацеркі па пустынях і вулканах.

Але аднойчы адзін наш маніпулятыўны і ўплывовы сябар Міша Бычанок, хітры прадзюсар з «Медыякуба» [беларускай прадакшн-кампаніі. – 34mag], які стаміўся чакаць ад нас новых песень, прыйшоў і кажа: «У мяне дзелавая прапанова. А давайце мы да вас у вёску прыедзем і здымем, як вы разам ствараеце альбом, і мы потым выпусцім пра гэта фільм». На той момант мы нічога ў вёсцы не запісвалі, проста купаліся і ў гамаках ляжалі. А тут аказалася, што яны ўсур'ёз і ўжо едуць. Давялося нам тэрмінова ўсе інструменты і абсталяванне везці ў вёску. З будынка садовага кінатэатра мы зрабілі рэпетыцыйную і назвалі яе Spinning Studio ў гонар патанулай вуды нашага аператара. Прыехала здымачная каманда, пачала за намі назіраць, і прыйшлося нам выкладваць усё, што было нажыта і назапашана за апошні час. А потым і зусім містыка пачалася: нас усіх накрыла нейкай тагасветнай прухай, шчасцем і няспынным імкненнем рабіць. Вось так з дапамогай гіпнозу і чароўнага пендаля за тыдзень мы і запісалі тое, што не маглі нарадзіць за некалькі гадоў.

Наш дом стаіць на самым беразе Белага Возера [побач праходзіў фэст Sprava. – 34mag]. Паводле легенды на яго дне ляжыць старажытны звон, а ў сотні метраў знаходзіцца тая самая Белая Царква, якая на захадзе сонца выпраменьвае святло і магію. Мы ўсе былі зараджаныя на шчасце і поспех, на канцэнтрацыю, супольнасць і чыстую творчасць, што ў горадзе на бягу наогул немагчыма. Думаем, менавіта гэта і будзе прасвечваць у трэках і тэкстах: трохі вогнішча, трохі закінутай царквы, трохі скалістага берага, пыльнага ветру, дыму, дажджу і зарападу.

Калі сцісла, асноўны пасыл альбома – мы ўсе памром, але спачатку спазнаем нешта афігенскае. У нас пачалі з'яўляцца новыя жыццёвыя пытанні, але ў той жа час мы ўсё тыя ж добрыя клоўны, якія прыносяць людзям смех і радасць. Так і атрымліваецца, што тут філасофскія тэмы перамяшаныя з зусім дзіцячымі. Гэта можна патлумачыць: гады ідуць, у кедах зімой ужо холадна, а тусавацца, насіцца па свеце, псаваць здароўе хочацца ўсё роўна. Слова «Сусвет» сустракаецца ў тэкстах альбома не менш за пяць разоў, таксама там Зямля, мора, караблі, зоркі, легенды, сяброўства, каханне, агонь і смерць, вядома.