РЭЛІЗ

В пустоте Нелюбов

Сёння на «Першаку» мы прэзентуем дэбютную работу беларускага электроннага one-man-праекта «Нелюбов». Міні-плытка «В пустоте» – гэта чатыры пранізаныя сэксуальнай электрычнасцю darkwave-песні, пад якія толькі і застаецца што падаць у бясконцы калодзеж жарсці і спадзявацца, што ён бяздонны. Але ён не бяздонны.

Нялюбаў пра рэліз:

– Два гады таму я вырашыў рабіць персанальны праект і пачаў шчыльна займацца прадакшнам з выкарыстаннем жалезных сінтэзатараў і грувбоксаў, менавіта яны збольшага матывавалі мяне ствараць музыку. На пачатку 2017-га я запісаў першую кампазіцыю «Иди за мной» і пазнаёміўся з Аляксандрам Балаганам, які зрабіў постпрадакшн, саўнддызайн, звядзенне і майстарынг маіх аранжыровак.

Лірычныя герой і гераіня песень – гэта пара, якая вядзе дыялог на працягу ўсяго альбома. Яны моцна кахаюць адно аднаго і гатовыя на ўсё дзеля сваёй любові. Яны ведаюць, што рана ці позна іх целы або пачуцці знікнуць, і гэтай непазбежнасцю прасякнуты ўсе трэкі ў міні-альбоме.

Па словах музыкі, зараз рыхтуецца анімацыйны кліп на песню «В пустоте», якім займаецца Дзяніс Крупскі. Над сцэнаром другога кліпа на песню «Иди за мной» шчыльна працуе рэжысёр Міша Пархоменка (сярод яго работ – кліпы для Tempo Bay і Rostany). Нялюбаў актыўна рэпетуе і ў бліжэйшы месяц плануе арганізаваць прэзентацыю міні-альбома, а праз паўгода выспець да поўнафарматніка. Сачы за абвесткамі!

«Нелюбов» у сеціве: