Прэм’ера кліпа: Applepicker танчыць у Асмалоўцы і пад «кукурузінамі»
Трэк артыста Applepicker «Hangin' Around» атрымаў настальгічнае відэаўвасабленне. Рэжысёр Кірыл Нонг змясціў гісторыю пра бесклапотнага вясёлага лайдака ў душэўныя менскія лакацыі.
Applepicker – псеўданім Мікіты Арлова ў яго сольнай дзейнасці па-за гуртом «СОЮЗ». «Hangin' Around» – песня з альбома «Еще больше песен про город и торговые центры», які суцэльна прысвечаны Менску. Мікіта распавядаў 34mag, што першую версію трэка запісаў яшчэ ў 2018-м, але тады кампазіцыя была ў іншай аранжыроўцы, да таго ж англамоўная.
Лірычны герой «Hangin' Around» прачынаецца аб адзінаццатай і рашуча не хоча працаваць, бо месяц ласкава падказаў яму «just keep hangin’ around» – і ён вырашыў не супраціўляцца такому плану.
Ідэя кліпа з’явілася падчас камунікацыі Мікіты Арлова з Кірылам Нонгам мінулым летам у Варшаве. Абодва хацелі зняць відэа ў Менску, але трапіць туды не мелі магчымасці. З’явілася ідэя звярнуцца да праграмы Unreal Engine, у якой можна ствараць рэалістычныя 3D-сусветы, – Кірыл акурат завяршаў працу над вялікім праектам у UE. Усю тваравую анімацыю і сінхроны здывмалі ў летнім варшаўскім парку. Рухі цела рабілі з выкарыстаннем відэазахопу. Унутры Unreal Engine Кірылу давялося шмат папрацаваць уручную. Агулам працэс стварэння кліпа заняў каля трох месяцаў.
Кірыл Нонг,
рэжысёр:
«Мяне натхняла жаданне перадаць лёгкасць і радасць, што асацыююцца з успамінамі пра маё былое жыццё ў Менску. Я хацеў выказаць гэта праз яркія вобразы, камічныя сітуацыі і вядомыя лакацыі, скажоныя ўспамінамі. Мая любімая сцэна, безумоўна, заключная, у Асмалоўцы. Праца над ёй дала мне найвялікшае задавальненне і стварыла ўтульную атмасферу падчас яе прадукавання».
Мікіта Арлоў,
Applepicker:
«Гэты трэк з'яўляецца вялікім хітом асабіста для мяне, і я вельмі рады, што ў Кірыла атрымалася зрабіць такое неверагоднае да яго відэа. Жыццёвы тэкст пра лайдака вельмі ўдала трансфармаваўся ў відэадзённік, дзе клеянне дурня ў аблічбаваным Менску пераплятаецца з начным кашмарам офіснага планктону. Сцэны з танцамі на віртуальнай вуліцы Веры Харужай і Асмалоўцы нагадаюць многім пра асабістыя прыгоды на любімых вуліцах горада. Відэа дапаўняе канцэпцыю альбома, дзе горад і яго элементы працягваюць іграць галоўную ролю».
Макс Старцаў,
менеджар:
«Я люблю пры кожным зручным і не вельмі выпадку выказваць захапленне Applepicker, называючы Мікіту адным з найлепшых беларускіх музыкаў у гісторыі. І я на сваім меркаванні ўпэўнена стаю. Так крута, што Мікіта з Кірылам творча знайшліся ў сваёй настальгіі. Кліп моцна перавысіў мае чаканні. Я часта яго пераглядаю, разглядваю, усміхаюся. Мне падаецца, што ён спадабаецца не толькі беларусам».
