Куды адправіцца ў Ноч музеяў – 2019?

ПАЛАЦ МАСТАЦТВА

 Дзе:  вул. Казлова, 3

 Калі:  з 16:00 да 4:00

 Кошт:  4 BYN

У Палацы мастацтва разгорнецца маштабная выстава «Успомніць заўтра», прысвечаная барацьбе з руцінай. Сярод удзельнікаў – Karma Crew, Мастацкая майстэрня 6В, Клуб інтэлектуальнага вольнага часу «Факультатыў», Сяргей Савіч, Дзмітрый Ягораў, Awlnight і многія іншыя. Прыходзь, каб вырвацца з зоны камфорту.

ГАЛЕРЭЯ ДК

 Дзе:  вул. Герцэна, 2а

 Кaлi:  з 16:00 да 24:00

 Кошт:  5 BYN

У рамках канцэптуальнай фотавыставы Віктара Сянькова «Трансфармацыя» пакажуць праект «Сляды», прысвечаны праблеме няправільнага падбору бялізны. Аснова праекта – скульптуры берасцейскага мастака Іллі Дударава: гэта гісторыя пра жанчын, якія забыліся на ўласны камфорт. Увага, выстава праходзіць пад цэнзам 18+!

МАЙСТЭРНЯ-АТЭЛЬЕ ДЫНАСТЫI КАШКУРЭВIЧАЎ

 Дзе:  вул. Сурганава, 42

 Калі:  з 20:00 да 01:00

 Кошт:  уваход вольны

Кашкурэвічы чакаюць усіх, хто цягнецца да мастацтва. Падчас «Гадзіны Творцы» ты зможаш памаляваць, памузіцыраваць, паспрачацца і пасябраваць з адэптамі вольнага мастацтва. У якасці бонусу – экалагічныя гарбата і кава.

НАЦЫЯНАЛЬНЫ МАСТАЦКІ МУЗЕЙ

 Дзе:  вул. Леніна, 20

 Калі:  з 19:00 да 24:00

 Кошт:  да 17 траўня – 12 BYN, у дзень правядзення акцыі – 15 BYN

НММ робіць стаўку на інтэрактыўнасць: наведвальнікі размалююць спецыяльныя палотны, паўдзельнічаюць у эксперыментальным тэатры, створаць карціну на шкле і апынуцца ў сусветных галерэях з дапамогай VR-тэхналогій. Таксама ў праграму ўваходзіць лекцыя пра прыроду пачуццяў, выступленні ансамбля труб і валторнаў, савецкая відэа- і аўдыяхроніка і салянка з мастацтва розных часоў і народаў.

ГАРАДСКАЯ МАСТАЦКАЯ ГАЛЕРЭЯ ТВОРАЎ Л.Д. ШЧАМЯЛЁВА

 Дзе:  вул. Рэвалюцыйная, 10

 Калі:  з 20:00 да 23:00

 Кошт:  4 BYN

Мастачка Хрысціна Высоцкая гатовая пагрузіць цябе ў свет сучаснага мастацкага тэкстылю. Табе ўдасца паглядзець на ўрбаністычны роспіс па тканіне, абстрактную скульптуру, габелены і тэкстыльную аплікацыю. Яшчэ ў праграму ўключаныя паказ-перформанс, арт-квіз і інстаграм-конкурс на самую крэатыўную фатаграфію – натуральна, з прызамі.

МУЗЕЙ ГІСТОРЫІ ГОРАДА МЕНСКА

 Дзе:  вул. Кірылы і Мяфодзія, 6, вул. Кірылы і Мяфодзія, 8, пл. Свабоды, 15

 Калі:  з 20:00 да 24:00

 Кошт:  5 BYN

Менскі музей гісторыі прадстаўляе гульню «Ноч. Меч. Электрапечка» – рыцарскі квэст, які раскінецца на тры пляцоўкі: экспазіцыю «карэтную», мастацкую галерэю Міхаіла Савіцкага і археалагічны музей «Верхні горад». Удзельнікі і ўдзельніцы ігрышчаў вывучаць калекцыю халоднай зброі пятнаццатага стагоддзя, палюбуюцца старадаўнімі аксэсуарамі і будуць змагацца на дуэлі – пераможцу вызначаць з дапамогай латарэі.

МЕНСКАЯ ГАРАДСКАЯ РАТУША

 Дзе:  пл. Свабоды, 2а

 Калі:  з 20:00 да 23:00

 Кошт:  5 BYN

Праявіць свой інтэлект можна на квізе «Класіка»: там спатрэбіцца веданне карцін, відэагульняў, фільмаў і класічнай музыкі. Гэтую ж музыку будуць граць у перапынках паміж турамі, а пасля табе раскрыюць таямніцы Менскай гарадской ратушы.

ДЗЯРЖАЎНЫ МУЗЕЙ ГІСТОРЫІ БЕЛАРУСКАЙ ЛІТАРАТУРЫ

 Дзе:  вул. Максіма Багдановіча, 13

 Калі:  з 17:00 да 24:00

 Кошт:  3 BYN

Вечар 18 траўня ты можаш правесці ў кампаніі пана Завальні. Шляхціц падрыхтаваў для цябе сустрэчу з беларускімі пісьменнікамі, выступы танцораў і скрыпачоў, майстар-класы па напісанні казак і вершаў, лекцыю пра кіно і паказ мультфільмаў, заснаваных на беларускіх казках. Дарэчы, прыходзіць на івэнт можна з дзецьмі – у пакоях пана Завальні будзе працаваць куток «Забавы для маленькіх шляхціцаў», дзе юныя наведвальнікі зоймуцца арт-тэрапіяй са сваімі бацькамі.

ЛIТАРАТУРНЫ МУЗЕЙ ЯНКI КУПАЛЫ

 Дзе:  вул. Янкі Купалы, 4

 Калі:  з 19:00 да 05:00

 Кошт:  2 BYN

Музей Янкі Купалы адзначае 75-гадовы юбілей, таму ўся выставачная канцэпцыя заснавана на гэтым ліку. Фонд музея прадставіць 75 прадметаў з незвычайнай гісторыяй, а кожны 75-ы наведвальнік атрымае спецыяльны прэзент. Дадаткам да гэтага дня нараджэння стануць выступы гуртоў «Стары Ольса» і «Палац», кірмаш і квэст «Купалаў код».

ЛIТАРАТУРНА-МЕМАРЫЯЛЬНЫ МУЗЕЙ ЯКУБА КОЛАСА

 Дзе:  вул. Акадэмічная, 5

 Калі:  з 17:00 да 23:00

 Кошт:  2 BYN

25 актыўнасцей, шэсць лакацый і шасцігадзінны хранаметраж – вось як выглядае праграма «Святло ў акне», арганізаваная музеем народнага паэта. Канцэрты, спектаклі, віктарыны, выставы, гульні і майстар-класы – прасцей убачыць усё самастойна, чым чытаць даўжэзны пералік.

МУЗЕЙ ЗАЙМАЛЬНЫХ НАВУК «КВАНТУМ»

 Дзе:  пр. газеты «Праўда», 29

 Калі:  з 19:00 да 00:00

 Кошт:  16 BYN – дарослы білет, 14 BYN – дзіцячы

Фанаты Ілана Маска змогуць ужыцца ў ролю куміра: запусціць уласную Falcon 9, даследаваць праект Space X і сесці за руль Tesla, якая лунае ў космасе. Таксама ты зможаш размаляваць партрэт вынаходніка і прасачыць за тым, як працуе яго мозг. Прыемны дадатак – мадэль чалавечага мозгу можна будзе зрабіць сваімі рукамі.

МУЗЕЙ АРХIТЭКТУРНЫХ МIНIЯЦЮР «КРАІНА МІНІ»

 Дзе:  пр. Незалежнасці, 25

 Калі:  з 18:00 да 01:00

 Кошт:  7 BYN

Так атрымалася, што Беларусь ператварылася ў мясціну Камянёў бясконцасці, і адшукаць артэфакты раней за Танаса ты зможаш падчас інтэрактыўнай экскурсіі. Да яе прыкладаюцца касплэеры, фотазона, значкі ды іншыя супергеройскія атрыбуты – добры варыянт для тых, хто нават у музеі не можа без «Марвел».

ЛIТАРАТУРНЫ МУЗЕЙ ПЕТРУСЯ БРОЎКІ

 Дзе:  вул. К. Маркса, 30

 Калі:  з 18:00 да 22:00

 Кошт:  3 BYN, да 19:00 – уваход вольны

Цяпер ты зможаш даведацца, што такое авангард: спецыялісты раскажуць пра яго гісторыю, формы, ідэі і прадстаўленне ў Беларусі. Аповед пра гэтую з'яву пачнецца з дэтэктыўнай гульні, а скончыцца выступам праекта Astary, Fishy і Blico.

НАЦЫЯНАЛЬНЫ ЦЭНТР СУЧАСНЫХ МАСТАЦТВАЎ

 Дзе:  вул. Някрасава, 3

 Калі:  з 18:00 да 6:00

 Кошт:  10 BYN

Тут пройдзе выстава-тусоўка Tum Blr. Прастора будзе адкрытай – пакінуць сваю працу і атрымаць на яе водгук змогуць усе жадаючыя. Таксама ў праграме: экспазіцыйны праект Background, Minsk Improvisers Orchestra, Bassota visual, Structurers Performing Group, FillFree і Ілля Дзягіль.