34mag

Маладыя беларускія ілюстратары – 2

Рубрыка: ВІЗУАЛ
10.08.2017
Аўтар: davydenko
13000

Летась мы пачалі знаёміць цябе з таленавітымі і маладымі беларускімі ілюстратарамi. У гэтай падборцы – яшчэ восем яркіх пуцяводных зорачак у свет візуалу.

Яна Галушкіна

Акварэль, акрыл, калаж, адбітак, графічны планшэт – чаго Яна толькі не выкарыстоўвае ў сваiм мастацтве. Яе ілюстрацыі – як стоп-кадр са сну, які ты забываеш пасля абуджэння. У сваім юным узросце мастачка ўжо атрымала поспех у кніжнай ілюстрацыі і цяпер штурмуе шафы моднікаў: менавіта на майках і сўітшотах зараз «плаваюць» яе акварэльныя акулы і пускаюць кветкі кактусы.

«Каб правільна перадаць настрой работ, я часта эксперыментую з колерам і кампазіцыяй. Каларыстыка – мой асноўны інструмент, каб найбольш дакладна адлюстраваць свае пачуцці і эмоцыі. Глыбіня колеру, інтэнсіўнасць, адценне, насычанасць, яркасць – усё гэта я старанна падбіраю і прапрацоўваю, каб на выхадзе атрымалася менавіта тое, што я бачу і адчуваю».

Behance Instagram

Саша Hade

У 2016-м гэты таленавіты стрыт-артыст трапіў у сотню лепшых мастакоў у Брысталі – на радзіме вядомага нам Бэнксi. На нашай Кастрычніцкай гэтак жа красуецца графіці з-пад рукі (і балончыкаў) Сашы. Але мастака не спыніць адной сценкай – ілюстрацыі Хадэ таксама пераўвасабляюцца ў стыкеры, аўтарскія фігуркі і асвяжаюць старонкі часопісаў.

«Каб з персанажа зрабіць нешта жывое, я пачынаю нанізваць на яго прыдуманую гісторыю, гронкі дэталяў і дробязяў, якія будуць раскрываць яго характар i звычкі. Калі гаворка iдзе пра сюжэтную ілюстрацыю, то наваспечаны герой трапляе ў прыдуманую сітуацыю або мы заспеем яго ў нейкі эмацыйна моцны момант. Пры ўсім гэтым, раздзімаючы працу дэталямі, адсылкамі ці складанымі эфектамі, важна не ўпусціць агульную ідэю, якая звяжа ўсе дробныя кавалачкі ў адно вялікае і адзінае цэлае».

CGPlus Instagram Artstation

Маргарыта Дабравольская

Тое, што дзяўчына чэрпае натхненне ад маці-прыроды, можна здагадацца па расліннай тэматыцы, якая суправаджае практычна кожную ілюстрацыю Рыты. А майстэрскае спляценне чорна-белых ліній і кропак злучае элементы ў адзіны пасыл.

«Важней за ўсё для мяне ў мастацтве, у сваіх і чужых работах, – гэта шчырасць. Нейкага канкрэтнага шаблону стварэння працы ў мяне няма, гэты працэс заўсёды хаатычны. Таму люблю працаваць без эскізаў, рабіць адразу “чыставік” і ў працэсе здзіўляцца ад таго, што атрымліваецца».

Behance Instagram

Іра Алюнiна

Лямпавыя і па-дзіцячы наіўныя карцінкі Іры пасля першага ж погляду пакідаюць максімальна далікатны прысмак: быццам ты скачаш па полі з вясёлкавымі поні. Вось кучаравы сабака разгойдваецца на драўлянам коніку, пасля – васьмiножак ласуецца воблачкамі. Ну як тут не растаць?

«Ілюстрацыя заваявала мяне тым, што адным малюнкам можна расказаць цэлую гісторыю, раскрыць персанажа. Гэта як фільм, толькі з аднаго кадра».

VK Behance Instagram

Ягор Keon

Гангста-стыль Кеона можна пазнаць за вярсту: тачкі, дошкі, гарматы – гэта ўсё пра яго. Маляванне ў Ягора ў прамым сэнсе ў крыві: ён не толькі з адукацыі мастак, але і пайшоў па творчых слядах бацькі. Часцяком хлопец пераганяе свае малюнкі ў анімацыю, а што з гэтага выходзіць – глядзі сам(-а).

Vimeo Instagram

Насця Малашонак

У Насцiных ілюстрацыях тэматыка казачнасці цесна суседнічае з сумнай задуменнасцю. Малюнкі, пададзеныя з элегантнай дзявочай рукі, хочацца доўга разглядаць, бо пачуцці яны выклікаюць неадназначныя. Насця актыўна займаецца дызайнам персанажаў і часцяком радуе сваіх шматлікіх падпісчыкаў у інстаграме свежымі ілюстрацыямі.

Instagram

Max Lazar

Макс выбраў сваім галоўным палатном вінілавыя пласцінкі. Ён прызнаецца, што шчыра любіць як маляванне, так і музыку. Хлопцу падабаецца міксаваць яркія колеры і немудрагелістыя формы, што разам з вінілавым палатном задае аўтарскі панк-стыль.

Instagram

Наташа Грабёнкіна

Ужо амаль з дзясятак гадоў Наташа штурмуе сваёй ілюстрацыяй розныя пляцоўкі: часопісы, дзіцячыя выданні, кнігі, настольныя гульні. Зараз дзяўчына працуе ў студыі «Саюзмультфільм». Спрытна спалучаючы акрыл, акварэль і аловак, Наташа выдае неверагоднай лёгкасці карцінкі. А на лагатыпы і афішы гэтай таленавітай лэдзі ты напэўна натыкаўся не адзін раз.

Behance