Таймлайн беларускага матацыкліста

  Як пазбегнуць аварыі з матацыклістам?  

На шматпалоснай дарозе байкеры звычайна рухаюцца паміж двума левымі палосамі, часта – з вельмі значным перавышэннем хуткасці, таму калі ты перастройваешся на суседнюю паласу, прапусці яго наперад. Увага пры левым павароце, байкеры не заўжды спыняюцца, калі спыняюцца машыны. Максімум увагі, калі загараецца «ружовае» святло, то-бок жоўтае пераключаецца на чырвонае. Не забывайся пра матацыкліста, калі ён трапляе ў тваю мёртвую зону бачнасці. Уключай паваротнік, нават калі ты аб’язджаеш люк. Ну і глядзі ў люстэрка, калі адчыняеш дзверы.

  Што такое каварэйсер?  

Каварэйсер – гэта байк, мадыфікаваны яго ўладальнікам для дасягнення высокіх хуткасцей на невялікіх адлегласцях, ад адной кавярні да другой . Тэрмінам «кафэрэйсер» называюць не толькі самі матацыклы, але і іх уладальнікаў. Дзвіжуха зарадзілася ў пасляваенныя часы ля лонданскай прыдарожнай кавярні Ace Cafe, дзе збіралася па некалькі сотняў байкераў. Па сутнасці, каварэйсеры – гэта першыя кастамныя байкі. У ЗША ў гэты ж час з’яўляюцца боберы – «абстрыжаныя» ад лішніх дэталяў з такой жа мэтай буйналітражныя апараты.

  Беларускі жаночы мотарух  

Хоць пра роўнасць і кажуць, але ў большасці мотаклубаў існуе забарона прымаць жанчын у свае шэрагі (а яшчэ цемнаскурых і гомасэксуалаў). Жаночыя клубы маркіруюцца адмысловымі абрэвіятурамі FMC (Female Moto Club) або WMC (Women Moto Club). У Беларусі існуе тры жаночыя аб’яднанні – Lady Riders, «Ласточки» і Angirls.

  Хто такія 1%?  

Тэрмін з’явіўся ў 1947 годзе, калі кіраўнік Амерыканскай Матацыклетнай Асацыяцыі заявіў, што ўвогуле ўсе матацыклісты добрыя і законапаслухмяныя хлопцы, і толькі 1% з іх парушаюць закон (outlaws). З таго часу пачалі афармляцца матацыклетныя банды, з самымі вядомымі з якіх, Hell’s Angels, тусіў добры час Хантэр Томпсан. Зараз да «аднапрацэнтнікаў» адносіцца «вялікая чацвёрка» клубаў – Hell’s Angels, Outlaws MC, Pagans MC і Bandidos MC. Па словах арганізатараў Recast Moto Fest, у Беларусі outlaws-клубаў няма.

  Што такое кастам?  

Кастамная культура – гэта ўсё тое, што куплена не на стоках у заводскім варыянце, а зроблена сваімі рукамі. Акрамя байкаў, сюды адносяцца малюнкі, пінстрайпінг і татуіроўкі. Сапраўдны кастам робіцца з нуля: купляеш рухавік, купляеш трубы, гнеш іх, робіш раму, купляеш асобна колы. Усё астатняе – гэта цюнінг. Сучасная хваля аматарскага кастамайзінгу зарадзілася гадоў пяць таму. А Recast Moto Fest – гэта ўсеагульны форум беларускіх кастамайзераў, каб яны пабачылі байкі адзін аднаго і абмеркавалі, як хто гне трубы.

  Што такое мотабол?  

Умоўна, гэта футбол на матацыклах. Сэнс гульні такі ж самы, але гуляюць з вялікім мячом і на асфальтаванай паверхні. Галоўныя беларускія асяродкі – гэта Пінск і Лунінец, каманды адтуль нядрэнна валяць на міжнародным узроўні. Дарэчы, у 2004 годзе зборная Беларусі выйграла Чэмпіянат Еўропы і чатыры разы брала срэбра. Лепшыя мотабольныя стадыёны, зноў жа, знаходзяцца ў Пінску і Лунінцы.

  Што значаць байкерскія нашыўкі?  

У байкерскім асяроддзі клубныя эмблемы называюцца «колеры», якія традыцыйна складаюцца з трох частак: верхні рокер з назвай мотаклуба, цэнтр з эмблемай клуба і ніжні рокер з месцам дыслакацыі клуба. Звычайна трохчасткавыя нашыўкі мелі «аднапрацэнтнікі», але зараз гэтае правіла строга не выконваецца. Назва тэрыторыі на ніжнім рокеры азначала прэтэнзію на кантроль пэўнага рэгіёна. Але, напрыклад, большасць беларускіх клубаў маюць агульную назву Belarus, а ў анархаскіраванага Rolling Anarchy MCC увогуле пазначана International Club. Дарэчы, нашыўку для іх стварыў адзін з заснавальнікаў клуба, беларускі мастак і дызайнер Уладзімір Цэслер.