Менскі ўрбаністычны форум: на што ісці?

Лекцыя «Стратэгічнае планаванне ў постсацыялістычным горадзе»

Дзе і калі: 19 верасня, 19:00, прастора «ЦЭХ»

Магістарка гарадскіх даследванняў з Прагі Эва Эснерава распавядзе пра тое, як можна адначасова атрымліваць асалоду ад Лангбарда і ўкараняць новыя стратэгіі развіцця, а ў выніку – палепшыць сітуацыю з даступнасцю жылля, стварыць пешаходныя районы і ажывіць цэнтр горада.

Лекцыя «Сучасныя тэндэнцыі развіцця Масквы: грамадскія прасторы, рэдэвелапмент, "Вялікая Масква"»

Дзе і калі: 21 верасня, 19:00, прастора «ЦЭХ»

Ці становіцца табе балюча і сумна, калі ўвечары ты прагульваешся па Траецкім прадмесці і твой позірк упіраецца ў вялізную сцяну Чыжа, якая распасціраецца да нябёсаў? Ці запаўняе ўсe твае думкі тое самае слова – рэдэвелапмент? Калі так, прыходзь на лекыю Дзмітрыя Нарынскага і паслухай, як змагаюцца з той жа самай праблемай у Маскве.

Лекцыя «Субкультурныя валацугі зменьваюць свой горад: Holzmarkt і Eckwerk як прыклады эксперыментальнага гарадскога развіцця»

Дзе і калі: 22 верасня, 19:30, Музей-майстэрня З.І.Азгура

Бэнджамін Шэрбарт на прыкладзе выбітных берлінскіх праектаў Holzmarkt і Eckwerk адкажа на вострыя сацыяльныя, эканамічныя і экалагічныя пытанні нашага часу. У аснове праектаў ляжыць ідэя неабмежаванага абмену ў абмежаванай прасторы. Даведайся аб тым, якімі могуць стаць цэлыя гарады ў бліжайшай будучыні.

Лекцыя «Развагі аб урбаністычных трансфармацыях ва Украіне пасля 2014 года»

Дзе і калі: 23 верасня, 20:00, Музей-майстэрня З.І.Азгура

«Чэмпіянаты праходзяць – дасягненні застаюцца» – такія прапагандысцкія білборды запоўнілі ўсю Украіну пасля завяршэння Чэмпіянату Еўропы па футболе ў 2012 годзе. Прайшло некалькі гадоў, і ва Украіне адбыўся Майдан. Нехта скажа, што самы час развешваць такія ж самыя білборды. А лектар Іван Вярбіцкі не пагодзіцца і распавядзе пра тое, як змяніліся ўкраінскія гарады пасля палітычных пертурбацый.

Лекцыя «Узводзячы дах над кальцавой дарогай Антверпена: развiццё поглядаў на супольнае стварэнне горада»

Дзе і калі: 24 верасня, 19:00, Музей-майстэрня З.І.Азгура

Паглядзеў(-ла) абодва сезоны True Detective і зараз эстакады і кальцавыя – гэта твой фетыш? У такім выпадку ты проста мусіш наведаць лекцыю Сепэ дэ Блуста, прысвечаную супрацоўніцтву грамадства і ўрады ў будаўніцтве Антверпенскай кальцавой дарогі. Аўтар паведаміць пра сучасную фазу праекта і паразважае аб пытаннях мабільнасці, якасці жыцця і экалогіі горада.

Альтэрнатыўны двор у Серабранцы

Дзе і калі: 23, 24, 29 верасня, двор дома па адрасе вул. Малініна, 30

Калі твой двор – гэта рыпучыя арэлі, лаўкі з аблезлай фарбай і клумбы з пластыкавых бутэлек, наведай Серабранку і даведайся, як зладзіць месца, дзе будзе цікава і камфортна ўсім: ад бабулек да міленіялаў. 23 і 24 верасня ў двары адбудуцца майстэрні, а 29 верасня на адкрыцці альтэрнатыўнага двара выступіць гурт «Нагуаль».