Хачу вучыцца: куды ісці?

 Школа крэатыўнага прадпрымальніцтва 

British Council

Праграма Creative Enterprise – гэта чатырохдзённы навучальны трэнінг для прадпрымальнікаў, якія кіруюць бізнэсам ці стартапам у любой з культурных і крэатыўных індустрый, а таксама для творчых людзей, якія плануюць пачаць такі бізнэс. 

Падавай заяўку, калі ў цябе ўжо ёсць ідэя для стартапа ці існуючы бізнэс у любым з сектараў крэатыўнага прадпрымальніцтва. Поўны спіс глядзі тут. Праграма бясплатная, аднак трэба заплаціць арганізацыйны ўнёсак 45 BYN.

 Дэдлайн – 14 студзеня 

 Курс фатаграфіі для пачаткоўцаў 

«ФШ1»

Калі ты прывык(-ла) здымаць у рэжыме auto і хочаш прасунуцца на іншы ўзровень, а ведаў не хапае, запісвайся на базавы курс па тэхніцы здымкі. Не абяцаем, што адразу станеш новым Карцье-Брэсонам, але асноўныя веды па кампазіцыі і працы са святлом атрымаеш.

Курс з шасці заняткаў абыдзецца ў 125 BYN. Займацца можна раніцай ці ўвечары. Выкладчыкі – Аляксандр Яшнікаў і Андрэй Дубінін.

 Старт – 16 студзеня 

 «Культурны Тэхнікум» 

«Культурны Тэхнікум» – гэта сустрэчы, якія арганізуюцца для спажывання аднаго культурнага прадукту ці твору мастацтва. Ты зможаш паспрабаваць розныя віды культурнага прадукта з тлумачэннямі і падказкамі пра тое, як рабіць гэта эфектыўна.

Навучальны год у «Культурным Тэхнікуме» пачнецца з лекцыі «Што такое Performance і Contemporary Dance Performance?». Сачы за падзеяй у FB.

 Калі – 20 студзеня 

 Е-School: Школа медыяменеджменту  

Калі ты марыш стаць медыяльвіцай ці медыяльвом, падавай заяўку на Школу медыяменеджменту. Тут цябе навучаць арганізоўваць працу медыя, кіраваць камандай і фінансамі, а таксама працаваць з бізнэс-канцэпцыяй медыяпраекта.

Запрашаюць медыяменеджараў – ад рэдактараў да кіраўнікоў медыяпраектаў НДА. Заняткі пачнуцца ў лютым і будуць складацца з чатырох сесій у Менску, Магілёве і Гродна. Навучанне бясплатнае.

 Дэдлайн – 26 студзеня 

 Асновы Computer Science ў IT-Academy 

Шлях у IT не такі цярністы, як табе падаецца. Калі ты вырашыў(-ла) змяніць жыццё і пайсці ў ІT, але не маеш адмысловай тэхнічнай падрыхтоўкі,  падавайся на гэты курс.

Ён не зробіць з цябе праграміста(-ку) на мільён, аднак стане штуршком на шляху да прафесіі Developer. Дарэчы, курс бясплатны. Трэба толькі прайсці тэст па логіцы і англійскай мове. 

 Калі – студзень-люты 

 Адукацыйныя курсы ад «Беларускай асацыяцыі журналістаў»  

Калі ты хочаш даведацца пра тое, як рабіць журналісцкія расследаванні і якія следчыя метады і інструменты працуюць, запісвайся на курс «Журналісцкае расследаванне: новыя трэнды і метады».

Яшчэ адзін круты курс ад БАЖа – пра працу з дадзенымі. Калі ты хочаш зрабіць першыя крокі ў журналістыцы дадзеных, рэгіструйся на адукацыйны курс «Асновы журналістыкі дадзеных».

Удзел у курсах бясплатны. 

 Дэдлайн – 28 студзеня