34mag

Гісторыя ў рэчах

28.06.2016
Аўтар: Natallia Rudakouskaya
11831 0

Мы пагутарылі са стваральнікам праекту 1067krama Аляксеем Сяргеевым, які распавёў, як зацікавіць людзей гісторыяй роднага горада з дапамогай малюнкаў на саколках і пачаць свой бізнэс у 18 гадоў са стартавым капіталам у 100 даляраў.

1067krama – гэта праект 18-гадовага Аляксея Сяргеева. Ён стварае саколкі, якія распавядаюць легенды паходжання назваў беларускіх гарадоў. Ідэя з'явілася год таму. За гэты час хлопец сам спрабаваў маляваць эскізы, шукаў людзей у каманду і разбіраўся ў гісторыі Беларусі. Тады ж з'явілася і назва, 1067 – першая згадка Менска і магчымасць паказаць, што крама based in Minsk.

Стартаваў праект толькі праз 8 месяцаў. За гэты час былі прыдуманыя майкі з легендамі шасці гарадоў – Менска, Гомеля, Горадні, Берасця, зараз дамалёўваюцца Магілёў і Віцебск. Сам Аляксей прызнаецца, што ягоныя любімыя гісторыі – пра асілкаў і волатаў Менеска ў Менску і Машэку ў Магілёве.

«Пакуль мы робім легенды толькі шасці абласных гарадоў, – распавядае Лёша. – Але мне ўжо пішуць і просяць зрабіць нешта такое, напрыклад, пра Ліду ці пра Заслаўе. Калі мы будзем бачыць, што запытаў шмат, то, вядома, пашырым геаграфію нашых легенд».

Зараз у камандзе 1067krama усяго 2 чалавекі. Аляксей – стваральнік і рухавік праекту – і Вікторыя, якая распрацоўвае дызайн. Ідэя саколак з малюнкам-легендай належыць Лёшы. Стартавым капіталам сталі грошы, якія яму падарылі на 18-годдзе, – прыкладна 100 даляраў. Хлопец сам адбірае цікавыя легенды і займаецца прасоўваннем у сацсетках. Са сваёй аднадумцай, дызайнеркай Вікторыяй, ён пазнаёміўся праз фэйсбук, заразіў яе ідэяй і прапанаваў папрацаваць над праектам разам.

«Задача была такая: калі чалавек убачыць маю майку, прачытае гэтыя легенды, а потым загугліць і пачытае гісторыю свайго роднага горада і гэтым натхніцца – значыць, я зрабіў усё правільна», – падагульняе Аляксей.