Другая частка «Рома едзе»

  • 28.07.2015
  • Аўтар: 34mag
  • 0

Ад сёння ў кнігарні «ЛогвінаЎ» можна прыдбаць папяровы асобнік апошняй часткі трэвэл-эпапеі «Рома едзе». Гэтая кніга – гісторыя доўгага вяртання дамоў праз пыл і дарогі Паўночнай і Паўднёвай Амерыкі, праз эксперыменты з рэальнасцю і ментальнасцю і, як і раней, гэта – бесперапынны тэст на давер самому сабе і вялікаму свету.

 

У мінулым лістападзе Рома Свечнікаў разам са сваёй баявой сяброўкай Воляй Палевіковай вярнуўся ў Менск. Так завяршылася рэаліці-казка пра сталенне і пазнанне свету, за развіццём якой мы сачылі апошнія тры гады. Інтэрнэт-праект паступова перарос сам сябе, і першая частка кнігі «Рома едзе» стала адным з галоўных беларускіх бестселераў летась. Апошнія паўгода разам з нашымі сябрамі з выдавецтва «Логвінаў» http://lohvinau.by/ мы рыхтавалі другую частку кнігі, якая нарэшце пабачыла свет.

 

 

Што кажа аўтар кнігі Рома Свечнікаў:

– У кнізе сабраныя тэксты пра падарожжа праз дзве Амерыкі – ад Аляскі да Аргенціны. Гэты адрэзак дарогі даўжынёй у паўтара года стаў для мяне абрадам ініцыяцыі. Праз тэксты я выварочваю свае дзіравыя кішэні і здымаю з сябе ўсё, што яшчэ не парвалася ад старасці. Крок па кроку я прабіраюся ўглыб уласнага міфа, ад куфра да труса, ад качкі да яйка і нарэшце да іголцы.

Я гляджу ў гэтыя старонкі як у люстэрка. У іх – усе мае д’яблы з факеламі, у іх мае начныя страхі і дзіравыя лёгкія. У іх я танцую на мыліцах хіп-хап на сельскай дыскатэцы, асуджаны на пагардлівыя погляды і махач за крамай.

Гэтая кніжка – пра маё працяглае інтра ў жыццё. Спадзяюся, яна можа быць карыснай табе суботнім ранкам у цьмяным метрапалітэне. Да пачатку пары яшчэ паўгадзіны, ты робіш апошні ўдых – і ўступаюць трубы.

 


Што кажа рэдактар кнігі Барыс Мікалайчык aka Danila Berencef:

– Проста цяпер я трымаю ў руках другую кнігу праекта «Рома едзе». І тое, што я адчуваю, складана апісаць словамі. Праца над кнігай пра падарожжа простага беларускага хлопца вакол планеты сама апынулася падарожжам, квэстам і перажываннем.

У адрозненне ад першай часткі, першай палоўкі планеты, дзе герой разганяўся, натхняўся і ўбіраў порамі матэрыю, прыроду і логіку вялізнага свету, другая кніга, другая палоўка зямной кулі, выйшла больш глыбокай і асабістай. Тут аўтар пачынае вяшчаць знутры, выплюхваць тое, што не змясцілася і не магло ўкласціся. Каштоўнасць гэтай кнігі ў тым, што яе пісала жыццё, а не чалавечае ўяўленне, у тым, што ўсё, расказанае на старонках, адбывалася насамрэч з хлопцам з суседняга двара.

Гэта вельмі важная і своечасовая літаратура для нас – для людзей, якія доўгі час спрабавалі пабудаваць сваё жыццё на адломках савецкай імперыі, савецкіх традыцый і мутацый. Нягледзячы на сваю простасць, кніга змяшчае ўнікальны антыідэалагічны пратэсны код. Яна паўстае супраць таго артадаксальнага і кансерватыўнага лайна, супраць запаветаў савецкага шарыяту, якія, пачынаючы са школы, працягваючы ўніверсітэтам і заканчваючы прафсаюзам на заводзе, паўзуць чырвонымі змеямі па нашых жылах. У ёй шмат забароненых тэм і практык, пра якія ў нашым грамадстве прынята маўчаць, падціснуўшы хвост. У ёй гаворыцца пра тое, што, пакуль у цябе ёсць ногі, важна хадзіць басанож.

Унутры гэтай кнігі б’ецца маладое і энергічнае сэрца. Прыемна назіраць за тым, як натуральны прыродны вірус гэтых літараў, прыгодаў і сэнсаў разлятаецца па інтэрнэце, перадаецца з вуснаў у вусны. Асабіста мне гэтая штука дапамагла затаптаць пару «матылькоў» з мінулага. «Шарык» круціцца, жыццё ўсміхаецца, мы ўсё едзем далей.

 

 

Зараз кармічныя браты Рома і Барыс здзяйсняюць іншая вялікае падарожжа – углыб нашай Радзімы. Месяц таму яны выправіліся ў шлях па абшарах Беларусі на айчынных роварах з кітайскімі маторамі – у пошуках тых сучасных міфаў і артэфактаў, якія фармуюць нашае пакаленне і якія неўзабаве знікнуць. Па выніках падарожжа плануецца стварыць трэвэл-док, а проста цяпер за прыгодамі хлопцаў і кітайскіх матораў можна сачыць у Instagram.

Электронны рэліз другой часткі кнігі «Рома едзе» плануецца на «Першаку» напрыканцы жніўня, а пасля вяртання герояў з чарговага трыпу чакайце на афлайн-сустрэчу з аўтарам «Рома едзе» ў Менску.


 

Дзе можна набыць другую кнігу «Рома едзе»?
– Кнігарня «Логвінаў» (пр. Незалежнасці, 37а), 10.00 – 22.00.
– Інтэрнэт-крама vilka.by

 

 

 


КАМЕНТАРЫ (0)

КАМЕНТАВАЦЬ