Вітанне, CherryVata!

  • 02.03.2017
  • Аўтар: 34mag
  • 0

Пасля 8-гадовага маўчання беларускі электронны гурт CherryVata вяртаецца з новым альбомам і абвяшчае збор сродкаў на яго фінальныя акорды. Мы трахец пагутарылі з фронтмэнам Дзмітрыем Літвіновічам aka Diamos Roll пра новае гучанне і адчуванні пасля 8-гадовага творчага перапынку.

 

Cherryvata была створана ў 2003 годзе дуэтам музыкаў Diamos Roll і Heinz Troy. Таксама ў праекце прымалі ўдзел вакалістка Vera Faith, MC Magic Zuloo, Аляксей Будзько і DJ Eye Q. У свой час бэнд стаў адным з самых бачных электронных беларускіх гуртоў, яго трэкі ўваходзілі ў сусветныя чарты трып-хопу нараўне з Massive Attack, Funki Porcini і Portishead. На рахунку гурта два поўнафарматнікі Intro Jagody (2004) і ViaVanilla (2009), некалькі іпішак, у тым ліку Infiity EP, якая выйшла ў снежні 2016-га. Цяпер гурт рыхтуе новы альбом, рэліз якога прызначаны на 22 красавіка.

 

 

Як зменіцца гучанне новай CherryVata?

– Канешне, адгалоскі трып-хоп музыкі мы пакінем. Гучанне стане больш дынамічным, з’явіцца рок, фанк і нават эмбіент, але з электроннай дамінантай, – карацей, будзе эклектыка, якая заўжды вылучала гурт CherryVata. Альбом мы запісваем з нашай новай вакалісткай Кацяй Штырц.

На якой стадыі альбом?

– Усе трэкі ўжо гатовыя, зараз запісваем вакал і даводзім усё да розуму.

Ці ёсць ужо назва?

– Рабочая назва – Daybreak.

Вы плануеце выпусціць альбом таксама і на CD. Якім накладам?

– Тыраж невялікі – 100-200 дыскаў, калі што, будзем дадрукоўваць. Частка пойдзе як падзяка спонсарам на краўдфандынгу. Астатнія можна будзе набыць фактычна з рук у рукі праз наш лэйбл Ezhevika ці як мерч на канцэртах.

Ці плануецца канцэртны тур з прэзентацыяй альбома?

– 29 красавіка мы прэзентуем плытку ў «Корпусе», таксама дамаўляемся з летнімі фестывалямі, але пра канкрэтныя споты гаварыць пакуль рана.

З якім адчуваннем вы вяртаецеся пасля 8-гадовага перапынку?

– Часткова мы ўжо вярнуліся ў снежні з новай EP Infinity. З альбомам, вядома, хвалюемся, таму што наша старая аўдыторыя ўжо вырасла. Наогул мы разлічваем на маладых, хоць і не ідзем за актуальнымі трэндамі, а чэрпаем натхненне хутчэй з музычных вытокаў 70-х, 80-х і 90-х.

 

 

 

Глядзі лайв-сесію CherryVata для праекта Minsk Music Sessions.

 

 

 

Фінансава падтрымаць запіс новага альбома CherryVata можна на краўдфандынгавай платформе Ulej.

 

Сачы за інфармацыяй пра новы альбом на нашым сайце, а таксама прыходзь на канцэрт гурта 29 красавіка ў культурны цэнтр «Корпус».

 


КАМЕНТАРЫ (0)

КАМЕНТАВАЦЬ