Болевыя кропкі Менска
- 23.06.2017
- 13436
У квартале Розы Люксембург – Лібкнехта да 2020 года плануюць знесці 40 малапавярховікаў. Прэзентацыя праекта адбылася 21 чэрвеня. Было горача: узрушаны люд набіў залу адміністрацыі Маскоўскага раёна пад завязку, абмеркаванне праходзіла на павышаных дэцыбелах, што відавочна стаміла «галоўнага адміністратара». «Усе толькі цікавяцца, калі знясуць і колькі дадуць», – рэзюмаваў ён.
Пакуль не ясна, якой вышыннасці будуць новыя жылыя дамы на Розачцы. Ініцыятыўная група з мясцовых жыхароў выступае супраць ушчыльнення раёна за кошт зносу і выказваецца за рэканструкцыю дамоў, дзе прынята сябраваць падзікамі.
Абмяркоўваюць праект да 13 ліпеня.
Занадта шмат зеляніны ў гэтым вашым Уруччы. Трэба ж і пра насельнікаў Парка высокіх тэхналогій падумаць – куды айцішнікам спускаць шалёныя бабкі? Яны ж не валуны, а жывыя людзі: дайце ім хлеба, піцы і барбершоп. Та-дам! На электронныя таргі выстаўлена 0,65 гектара зялёнай зоны па вуліцы акадэміка Купрэвіча. Па ўмовах аўкцыёну быць тут гандлёваму цэнтру з аб'ектамі грамадскага харчавання і бытавога сэрвісу.
Тэрыторыя ляціць з малатка 14 ліпеня. Пачатковая цана лота – 273 260 рублёў. Будзеш браць?
«Танцпол на вуліцы – не зусім правільна» – здаецца, у РУУС зварганілі для Менска канкрэтны слоган. 14 чэрвеня ў адміністрацыі Цэнтральнага раёна ў закрытым ад прэсы фармаце распякалі ўласнікаў бараў па вуліцы Зыбіцкай. Замахнуліся на святое – паўночны дажор блінцамі: ДЭПО (і яшчэ парачцы ўстаноў) загадалі працаваць да 23:00.
Акрамя таго, падчас маніторынгу чыноўнікі заўважылі смецце, так што не хвалюйся: цяпер сметніц на Зыбе стане больш. І замежнікі, што ванітуюць на плітку каля бараў, абавязкова распавядуць суайчыннікам пра дзіўную выспу чысціні ва Усходняй Еўропе.
Маніторынг абяцаюць у хуткасці паўтарыць, так што глядзі – не занадта выходзь з берагоў па пятніцах.
Жыхары даражэнных дамоў у Бранявым і Вайсковым завулках чакалі на капрамонт, а дачакаліся ўшчыльнення. Файныя сталінкі хочуць рэканструяваць і надбудаваць мансардныя паверхі. Тутэйшаму кам'юніці, у звычцы якога – пакідаць ключы суседзям падчас італьянскіх вандровак, падобна, прыйдзецца ўжывацца з кімсьці яшчэ.
Таксама на раёне плануюць вырашыць пытанне з парковачнымі пляцоўкамі: у праекце фігуруюць тры паркінгі на 240 машына-месцаў.
Азнаёміцца з праектнымі матэрыяламі можна да 26 чэрвеня.
У Калінінградскім завулку даўно збіраюцца пабудаваць штосьці прыстойнае на месцы барака-развалюхі. Спачатку кампанія EPAM планавала ўзвесці тут жыллё для сваіх светлых галоў, але не зраслося, так што цяпер за справу бярэцца Мінаблвыканкам. Жыхарам прылеглых вуліц не падабаецца, што іх меркаваннем ніхто наогул не пацікавіўся. Між тым 12-павярховік пазбавіць іх зялёнай тэрыторыі і дзіцячай пляцоўкі.
Не Менск, але. Запусціўшы сякеру ў мясцовы лес, чыноўнікі хочуць пабудаваць у Бараўлянах дзіцячы садок і школу, а таксама пашырыць мясцовую дарогу. З функцыяй прыродных лёгкіх Прылепскі нацыянальны заказнік, маўляў, справіцца і без дублёраў, а чэргі ў садок ужо касмічныя. Мясцовыя жыхары эмацыйна называюць задуму чыноўнікаў рэйдарскім захопам і падазраюць, што разам з сацыяльна карыснымі аб'ектамі ў іх салаўіным гаі прарастуць клятыя панэлькі.
Дэдлайн грамадскага абмеркавання – 26 чэрвеня. Калі ёсць што сказаць наконт, у сельсавеце для цябе завялі асобны школьны сшытак.
У «квадраце» Першамайская – Пуліхава – Смаленская – Леніна зносяць некаторыя дамы, склады, лазню і гараж. Узводзіць плануюць дзіцячыя садкі і шматфункцыянальныя комплексы з паркінгамі і жылымі блокамі. Таксама архітэктары хочуць аднавіць мост праз Свіслач ад Чырвонаармейскай на Смаленскую.
На абмеркаванні праекта 29 траўня стаяў такі шум і гам, што галоўная архітэктарка адміністрацыі Цэнтральнага раёна ў нейкі момант не вытрымала і спытала, ці ўжо скончаны «цырк на сёння». Гэта, зрэшты, не тое каб астудзіла запал тых, хто сабраўся. Людзі не разумелі, чаму іх хаты трэба зносіць замест таго, каб адкапрэмонціць – хоць бы адзіны раз за непраглядную цемру гадоў.
Мяркуецца, што праект вельмі зацяжны. Па запэўніванні аўтара Вячаслава Яўсеева, «патрэбныя сродкі і інвестары. Таму калі яны не знойдуцца, праект наогул застанецца толькі на паперы». Але сачыць усё роўна варта.
«Вёска» Тучынка па-ранейшаму не задавальняе горад
На абмеркаванні плана ліквідаваць прыватную забудову па Гусоўскага – Харкаўскай – Верашчагіна – Адоеўскага галоўны архітэктар «Мінскграда» Аляксандр Акенцьеў прапанаваў прысутным мысліць метафізічна: «Гаворка ідзе пра развіццё найбуйнейшага еўрапейскага горада, і неабходнасць гэтага развіцця ўзнікае не па капрызах архітэктараў. Па законах фізікі руху транспарту, руху рэчыва энергіі, як Вярнадскі казаў, забяспечваецца па божых законах, а не па юрыдычных або эмацыйных ці суб'ектыўных».
Гэта не вельмі задаволіла жыхароў Тучынкі, якія ўвесь час спрабавалі зразумець, на якой падставе інвестар можа будаваць нешта на прыватызаваных участках. Калі і каго зносяць – па-ранейшаму незразумела.
У мікрараёне Сосны, калі ты не ў курсах, знаходзяцца інстытут энергетычных і ядзерных даследаванняў, магільнік для пахавання радыеактыўных адкідаў, гарадскі сметнік, акумулятарны завод і хімічная вытворчасць. Але праз некалькі гадоў прамысловых зон стане яшчэ больш. Грамадскія абмеркаванні ўжо адбыліся, так што праект рухаецца далей.
Адзін з жыхароў вуліцы Дворышча назваў чыноўнікаў «носьбітамі нацысцкага плана “ОСТ”»: маўляў, жывуць мясцовыя пад пагрозай зносу, нібы народ на захопленай тэрыторыі – развівацца рашуча немагчыма.
Тэрміны зносу па-ранейшаму цьмяныя, а вось будаваць у Чыжоўцы хочуць спартыўны аб'ект з басейнам, трэнажорнымі і спартыўнымі заламі, а таксама спартыўна-рэкрэацыйную зону з вяслярным каналам. Аказалася, што ў імя ЗЛЖ менскія горадабудаўнікі гатовыя нават перамяшчаць выспы!
Пераход на плошчы Якуба Коласа хочуць абсталяваць відэакамерамі, каб разагнаць кудысьці па іншых лакацыях прадаўцоў(-шчыц) ландышаў, пальчатак, спінераў і кацянят.
Адміністрацыю Савецкага раёна даўно напружвае гэтая залішне свабодная эканамічная зона, а штраф у тры базавыя тут лічаць дзіцячай мерай супраць парушальнікаў парадку.
У «Гаррамліўнясцёку» тлумачаць: будаўніцтва калектараў абыходзіцца гораду занадта дорага, ну а рэканструяваць сістэму дажджавой каналізацыі ў цэнтры і зусім Mission: Impossible. Здарыцца такі калапс, што рызыкуе трапіць ва ўсе летапісы (чытай: твітары). Карацей, калі намылішся ўлетку на Нямігу, дык рыхтуйся патэставаць ровар на водных перашкодах. Пабач у гэтым даўно забытую дзіцячую радасць і папусціся.
Гэта він!
Падчас шпацыру па «Трактарагорадзе», які трапіў пад раздачу не зважаючы ні на што, любы актывісцка-ўрбаністічны імпэт можа выявіцца бязглуздзіцай. На выпадак гэткай маркоты трымай жменю аптымістычных лічбаў:
15 дзён абаронцы Курапатаў стаялі лагерам на марозе, каб у будаўнікоў бізнэс-цэнтра прапала жаданне будаваць яго на месцы пахавання ахвяр сталінскіх рэпрэсій.
9 гадзін спатрэбілася абаронцам сквера ў Котаўцы, каб пацвердзіць сур'ёзнасць сваіх намераў і прымусіць улады спачатку прытармазіць з вырубкай, а потым наогул адмовіцца ад ідэі з касцёлам у зялёнай зоне.
1200 чалавек паўдзельнічалі ў анкетаванні, на падставе якога ў скверы за «Рыгай» не будуць уладкоўваць пляцоўкі для ўрачыстых мерапрыемстваў і сезоннага гандлю.
1 суткі – такі тэрмін спатрэбіўся жыхарам Цэнтральнай вуліцы, каб дамагчыся дыялогу з чыноўнікамі і будаўнікамі наконт вырубкі дрэваў пад пракладку цеплатрасы.
192 каментары набрала навіна аб ліквідацыі фруктовых намётаў на вуліцах Менска на партале TUT.BY, і гэтыя каменты, мяркуючы па ўсім, прачыталі ў Менгарвыканкаме.
Памятай: гэтаму шалёнаму гораду, дзе сёння могуць высадзіць сквер, а праз тры тыдні яго ўшатаць, надзвычай патрэбныя людзі, гатовыя стаяць гарой за тое, што ім важна. Але стаяць да канца. На змену тэгу #асмалоўкажыві павінен прыйсці тэг #капрэмонтасмалоўцы!
Чытаць яшчэ:
Стоп сексизм!
В нашем гайдлайне вместе с цивилизованным миром снимаем патриархальные шоры и делаем прививку от сексизма.
Новая музыка: Zakharik, Isna Trio, Nemiga, Денис «Грязь»
Рассказываем, чем живет беларусская музыка.
Смотри клип D.Jaza, снятый на стадионе «Динамо»
Нужно больше беларусского соула.
34 кліча цябе на інтэнсіў па працы медыя
Распавядзем, як рабіць класныя тэксты і браць крутыя інтэрв'ю.
На галоўнай:
Новы праект пра свядомую моду запрашае на варкшопы ў Варшаве і Тбілісі
Каб зрабіць упрыгожанне на ялінку ці звязаць шопер.
Як зберагчы калектыў ад перагрэву і канфліктаў? Меркаванне сацыятэхніка
І не забываем перадаваць веды новым пакаленням.
Ад «Салюту» да світання: менскі клубны рух другой паловы 1990-х
Росквіт размаітасці і крызісны заняпад.
10 праграм, каб навесці парадак з грашыма
Адсочвай маніфлоў, адкладай на мару, пампуй добрыя звычкі.
«Мне адгукаецца гісторыя вечных чужынцаў»: размова з мастачкай Марыяй Гвардзейцавай
Пра дом, пра памяць, пра боль, у якім усе роўныя.
КАМЕНТАРЫ (5)
Поняла) сорян)
Простите, а что значит "болевые" в тексте на бел мове?
А чаму цішыня вакол трактарнага гарадка? Унікальны ж раёнчык! Чым ён горшы за Асмалоўку?? Як па мне, дык нават цікавейшы і прыгажэйшы.
Если что - айцишники против вырубки леса на Купревича/Скорины, это уже давно обсуждается между жителями. А еще против уплотнения рядом высоток, которые построят на грунтовых водах (!) , возможно с уничтожением пруда естественного происхождения, который спасали жители района (!), без общего обсуждения проекта (!) для уплотнения и без того достаточно плотного квартала. Лучше бы на пустыре построили фитнесс-центр и тот же магазин и не трогали готовый скверик!
У раёне Гвардзейская-Тарханава-Гастэла таксама маленькія ўтульныя дамы вясной збіраюцца зносіць..