«Белое зеркало 2017»: што глядзець

2–4 чэрвеня ў «Корпусе» нешта муціцца, вінілы круцяцца. Папа Бо & Co ладзяць чарговы фэст «Белое зеркало». Цябе клічуць глянуць савецкі мульт, які ты дакладна не бачыў(-ла) – ды яшчэ ў тапёрскім суправаджэнні! – купіць наўздагад даражэзную плытку, стаптаць «вансы» пад трохгадзінны сэт найкруцейшага нямецкага дыск-жакея і зарадзіць сваю сардэчную батарэйку ад неўвядальнай Бенькі.

 

Аргі абяцаюць антыкрызісную сесію, і гэта рэальнае «слова пацана»: тры дні бясконцай весялухі па цане пяці капучынак — глядзі, каб губа не трэснула. І нават калі ты не разумееш, навошта, разваліўшыся ў бінбэгу, глядзець мульцікі пад музло і хто такі наогул гэты хвалёны Міхаэль Рутэн, – хуценька чухай у «Корпус», каб потым не хныкаць. «Наша каманда заўсёды выступае за даступнасць. У людзей не хапае грошай на ежу, і ў такія моманты забавы стаяць на апошнім месцы. Наўрад ці хто-небудзь з вас знойдзе ў афішы Менска яшчэ адно трохдзённае мерапрыемства, настолькі насычанае актыўнасцямі, па цане 20 рублёў за 3 дні», – акцэнтуе арганізатар фэсту Саша Папа Бо Багданаў. Ну, што там падрыхтавалі менскія пасіянарыі? Глядзім!

 

 

2.06, тапёрская пятніца

Праграма «Белого зеркала» адкрыецца ў 18:00 лекцыяй усюдыіснага і цудоўнага спікера Макса Жбанкова. Ён растлумачыць, на якую халеру фільмам тая музыка здалася. Лекцыя мае кодавую назву «Жукі ў мурашніку».

Адразу пасля жвавага лікбезу мурашнік штодзённасці разварушаць беларускія музыкі. Парэчын, Рагозін, Цябут, Дзягель, Залескі і музычны праект ayva – усе яны агучаць савецкія мульты, якія, бадай што, старэйшыя за цябе. Прыдатны спосаб распачаць уік-энд!

 

 

3.06, вінілавая субота

На другі дзень фэсту можна папросту падчапіць вінілавую ліхаманку. Менскія калекцыянеры павымаюць з засекаў свае плыткі-скарбы, хто пакрасавацца, а хто і прадаць. Пафнуцій, Пракоп, Lipski, Gaamer, Gips, Шумілін, Miracle Libido (Масква), Саша Якаўлеў (СПб), Міхаэль Рутэн (Германія) – ствараць настрой на маркеце ў дворыку «Корпуса», натуральна, будуць кіты вінілавага гуку. Музычны марафон пачнецца ў 14:00.

Бліжэй да змяркання адбудзецца беларуская прэм’ера дакументалкі «Перавярні плытку» пра тое, як вініл памёр, а потым уваскрэс у эпоху, калі ўся дыскаграфія AC/DC змяшчаецца ў 10-грамовай скрыначцы айпода. «Перавярні плытку» – меламанскі фільм-падарожжа да «самага шчырага і чалавечнага фармату музыкі», або, па выразе аднаго з герояў стужкі, у «свет дрочарства» – адно другога не выключае.

Потым разявай рот на самыя разынкі: надыходзіць час тусічу. У Менск едзе чалавек, які круціць пласцінкі 30 гадоў. Клічуць яго Міхаэль Рутэн, які вядомы ўсім меламанам па радыё-перадачы і серыі падкастаў Soulsearching пра рэдкую музыку на вініле. У архіве Міхаэля больш за 800 такіх перадач, першы выпуск адбыўся ажно ў 1991 годзе. Толькі ўяві, якая ў яго калекцыя, – душу можна залажыць.

 

 

 

4.06, пранікнёная нядзеля

На мінулых «люстэрках» хэдлайнерамі былі The Tiger Lillies, Lee Scratch Perry і НОМ. «Я сам мару пра тое, каб у адзін з дзён на фестывалі быў прадстаўлены беларускі фільм пра музыку ці артыста», – казаў Папа Бо ў 2015-м. І вось, адбылося! Сёлета магія «Белого зеркала» чыніцца пад беларускі вайб.

У 19:00 нам пакажуць фільм-роздум «Унутранае / INLY» Каці Львовай з нашымі любімымі музыкамі: Светай Бень, Сяргеем Пукстам, Аляксеем Варсобам і Марынай Неўгень. Пасля таго як патухнуць цітры, персанажы фільма сыдуць з экрана і адыграюць канцэртныя сэты. Цвік-прэм’ера вечара – Sveta Ben і Арцём Залескі ўпершыню грымнуць дуэтам «Мікракабарэ».

Глядзі, як Менск глядзеўся ў «Белае люстэрка» ў мінулы раз, і прыходзь зазірнуць у гэты.

 

 


КАМЕНТАРЫ (0)

КАМЕНТАВАЦЬ