Кароткая гісторыя авіяцыі і яе герояў
- 31.03.2020
- 4753
Ці ведаеце вы, што каля Менска ёсць цэлы раён, назвы вуліц у якім так ці інакш звязаныя з авіяцыяй? Разам з кампаніяй «А-100 Дэвелапмент», стваральнікам жылога комплексу Новая Баравая, мы падрыхтавалі серыю падкастаў пра гісторыю авіяцыі і яе важных герояў. Цісні на play!
Новая Баравая – не толькі жылы комплекс, пабудаваны з увагай і клопатам пра яго жыхароў, але і месца з багатай авіяцыйнай гісторыяй.
Тут у 1934 годзе быў заснаваны аэраклуб ДТСААФ, і ўсе, хто марыў пра неба, маглі ажыццявіць мару: скокнуць з парашутам, палётаць на самалётах Ан-2 і Як-52 або пракаціцца на верталёце Мі-2. На аэрадроме «Баравая» праводзіліся спаборніцтвы і фестываль авіяцыйнага спорту. Тут адкрыўся першы ў Беларусі Музей авіяцыйнай тэхнікі, дзе можна было ў прамым сэнсе дакрануцца да авіяцыйных легенд, забрацца ў кабіну самалёта і ўявіць сябе на месцы пілота.
Цяпер Новая Баравая – жылы комплекс, які далікатна захаваў мінулае гэтага месца ў назвах вуліц: Нябесная і Авіяцыйная, імя братоў Райт і Амеліі Эрхарт, Арцёма Мікаяна і Міхаіла Міля, Мікалая Камава і Аляксандра Якаўлева і, вядома, вынаходніка першых лятальных апаратаў Леанарда да Вінчы. Адпраўляемся вывучаць гісторыю авіяцыі і гуляць па вуліцах Новай Баравой.
ЗМЕСТ:
01. Кароткая гісторыя авіяцыі (Леанарда да Вінчы)
02. Браты Райт
03. Арцём Мікаян
04. Міхаіл Міль
05. Мікалай Камаў
07. Амелія Эрхарт
Кароткая гісторыя авіяцыі (Леанарда да Вінчы)
Уся гісторыя авіяцыі – гэта чарада вынаходак, адчайных эксперыментаў і лёсавызначальных рашэнняў, якім спачатку ніхто не надаваў значэння.
Ад першага палёту чалавека на штучных крылах, які здарыўся ў 875 годзе, доўжыўся 10 хвілін і ледзь не скончыўся трагедыяй, – да Леанарда да Вінчы, які фактычна вынайшаў верталёт, але так і не апублікаваў свае чарцяжы. Ад братоў Мангальф’е, якія прыдумалі паветраны шар, – да братоў Райт, якія стварылі самалёт. Ад першых кругасветных палётаў да камерцыйнай авіяцыі.
І тая гісторыя, што ў нашым кароткім пераказванні займае 10 хвілін, у чалавецтва заняла больш за тысячу гадоў.
Браты Уілбур і Орвіл Райт былі апантанымі амерыканскімі прадпрымальнікамі з авантурным складам характару, які дапамог ім, нягледзячы на чараду правалаў, стаць прызнанымі вынаходнікамі першага самалёта і зарабіць прыстойнае багацце, хоць абодва нават не скончылі школу.
У падкасце вы даведаецеся, якім быў іх першы бізнэс (не надта ўдалы), хто забараняў братам садзіцца ўдваіх у адзін самалёт і як дасціпны заклад з арміяй ЗША дапамог Райтам заключыць сапраўды выгадны кантракт.
Вуліца Арцёма Мікаяна ў Новай Баравой названая ў гонар авіяканструктара, які дзякуючы рэзкаму і ўвогуле выпадковаму павароту ў жыцці стаў легендай сусветнай авіяцыі і стварыў марку «Міг», на самалётах якой было пастаўлена 55 сусветных рэкордаў.
Вынаходнік нарадзіўся ў 1905 годзе ў маленькім горным паселішчы Тыфліскай губерні. Гэта быў час перамен і рэвалюцыйнай рамантыкі, калі здавалася, што ідэі справядлівасці для ўсіх людзей могуць сапраўды змяніць свет. Ды і пераламаць уласны лёс было як быццам проста: напрыклад, звычайным хлапчукам з маленечкай армянскай вёскі стаць вядомым палітыкам і галоўным авіяканструктарам свайго часу.
Міхаіл Міль, стваральнік маркі верталётаў «Мі», у дзяцінстве марыў стаць мастаком і свае памкненні пранёс праз усю кар'еру. Кажуць, ён заўсёды спачатку маляваў мадэль, перш чым яна станавілася чарцяжом, абрастала металам і падымалася ў паветра. Міль абавязкова прысутнічаў на выпрабаваннях новых машын, але, будучы чалавекам забабонным, ніколі не прызначаў іх на 13-е чысло. Гэта не дапамагло – аднойчы на выпрабаваннях здарылася трагедыя... але пра ўсё па парадку – у нашай аўдыягісторыі.
Мікалай Камаў – той самы чалавек, які ўвёў ва ўжытак слова «верталёт» замест запазычанага «гелікоптар». Ён быў кіраўніком канструктарскага бюро, распрацоўваў верталёты маркі «Ка» і фактычна ўсю кар'еру канкураваў са сваім земляком з Іркуцка Міхаілам Мілем. І ў гэтым суперніцтве нараджаліся лепшыя мадэлі.
У жылым комплексе Новая Баравая ёсць вуліца імя Аляксандра Якаўлева. Яна названая ў гонар авіяканструктара, які стварыў легендарныя самалёты «Як».
Гісторыя Якаўлева цікавая не толькі тым, што ён распрацаваў адны з самых паспяховых мадэляў самалётаў XX стагоддзя, але і тым, што дзеля сваёй любімай справы адмовіўся ад кар'еры партыйнага функцыянера, а для гэтага яму давялося знайсці аргументы ў размове са Сталіным – падаваць у адстаўку па сваім жаданні ў тыя часы было не вельмі прынята.
Амелія Эрхарт – сапраўдная супергераіня для дзяўчынак ва ўсім свеце. У 1932 годзе яна стала першай жанчынай, якая ў адзіночку на самалёце перасекла Атлантычны акіян.
Яе поўнае прыгод жыццё – гатовы сюжэт для кніг і кінасцэнароў. У ім было ўсё: ігра на банджа ў мюзік-холе, гонкі на самалётах, сусветныя рэкорды, неверагодная папулярнасць, сяброўства з першай лэдзі ЗША і... таямнічае знікненне ў 1937 годзе, загадка якога да гэтага часу не разгаданая.
Новая Баравая ад «А-100 Дэвелапмент» – гэта горад-супольнасць з асаблівай атмасферай, у якім усё прадумана да дробязей. Месца, дзе ідэі і тэхналогіі ствараюць камфортнае асяроддзе для жыцця, працы і вучобы. І нягледзячы на тое, што кожны квартал адрозніваецца ад іншых уласнай інфраструктурай, планіроўкай і настроем, усе яны фармуюць адзінае еўрапейскае гарадское асяроддзе..
Над падкастамі працавалі: Марыя Гуліна (тэксты), Антон Кашлікаў (рэдактура), Ліда Наліўка (пераклад на беларускую), Станіслаў Мытнік (голас), Plato Sound (саўнд-дызайн).
Таварыства з абмежаванай адказнасцю «Астодевелопмент»
УНП 691759953