10 сітуацый, калі варта скарыстацца airplane mode

  • 13.03.2018
  • Аўтар: Manaxrom
  • 1916 2

 

Airplane mode – гэта фіча, якая адрубае твой смартфон ад мабільнай сувязі і інтэрнэт-трафіку, а часцяком і ад Wi-Fi з Bluetooth. Разглядаем, у якіх жыццёвых сцэнарыях яна можа спатрэбіцца.

 

У самалёце

Самая відавочная сітуацыя. Пасля кінематаграфічнай замалёўкі на тэму «Нам усім кабзда» актывізаваць «самалётны рэжым» заўжды просяць сцюарды і сцюардэсы, бо гукі перашкодаў, якія выдае твой мабільнік, дадаюць нойз-року ў перагаворы дыспетчараў з пілотамі, а гэта нервуе. Хоць не крытычна, але хто насамрэч ведае, як самалёт лятае… 

 

 

 

Каб хутка зарадзіць тэлефон

Калі ты вяртаешся з чарговага рэйва, а праз гадзіну ўжо на працу ці вучобу, то хуткі шлях зарадзіць смартфон – гэта перавесці яго ў рэжым airplane mode. Тады твой гаджэт не будзе траціць лішнія сілы на канэкт з сеткай. Ды і табе не лішне адпачыць гадзінку.

 

Каб заняцца сэксам

Нішто так не раздражняе, як чалавек, які адпраўляе па адным слове ў паведамленнях. Асабліва ў той момант, калі ты спазнаеш запаветныя выгібы цела каханага(-ай). Перавядзі лепш сваю электроніку ў рэжым mp3-плэеру і ўключы дыскаграфію тых жа The Kills.

 

Каб сустрэцца з сябрамі

Лепшы шлях выдатна правесці час з сябрамі – гэта адрэзаць сабе магчымасць выпадання з дыскурсу. Хаця, канешне, заўжды застаецца спакуса пакінуць адзін дэвайс у анлайне: як жа паказваць апошнія мемасы, кліпцы ці ўвогуле зладзіць youtube-вечарынку па псіхадэлічным кантры?

 

 

 

Каб адарвацца ад працы

Што можа быць лепш, калі твой тэлефон маўчыць ад бездані паведамленняў, а ты лагодна чытаеш томік Лаўкрафта пад ранішнія круасаны? Толькі калі наступным тваім крокам будзе акунуцца ў пяшчотнае морачка.

 

Каб не адрывацца ад працы

Адваротная сітуацыя. Трэба шмат паспець па працы, а колькі ўсяго цікавага прапануюць алгарытмічныя стужкі тваіх сацсетак…

 

На інтэрв’ю

Рэальная сітуацыя нашай калегі: запісвала размову з героям на тэлефонны дыктафон, пасля нехта патэлефанаваў – і ўсё на хер скінулася. Каб не было такіх фэйлаў, абразай сваю сувязь са знешнім светам. Або пішы на асобны дыктафон.

 

Каб скрыць месцазнаходжанне

Пункт для паклоннікаў творчасці Філіпа Дзіка. Усім вядома, што тэлефон акрамя мабільнай сувязі мае GPS-навігацыю, якая пастаянна трэкіць, дзе ты зараз знаходзішся (з дакладнасцю да некалькіх метраў). Калі цябе задзяўбло, што нават маці ведае, дзе ты швэндаешся, уключай не толькі «эйрплэйн моўд», але і выключай GPS-антэну.

 

 

 

Калі медытуеш

Хоць медытацыя і прадугледжвае поўную індыферэнтнасць да знешніх гукаў падчас заняткаў, але, пагадзіся, вопыт будызму будзе ярчэйшы, калі да тваёй свядомасці будуць даносіцца толькі спевы шпакоў і Дэвы Прэмал.

 

Калі займаешся спортам

Спорт – увогуле файная нагода не толькі патрэніраваць свае заскарузлыя цягліцы, але і адпачыць ад інфармацыі. Праверана на ўласным вопыце: адныя з лепшых думак прыходзяць тады, калі ты ўжо шаснаццаты круг намотваеш у стацыянарным тур-дэ-франс або марафоніш па ваколіцах свайго мікрараёна.

 

Увогуле ўсе гэтыя сітуацыі – гэта маленькія выспачкі, якія дазваляюць табе спакойна пабыць сам-насам, абдумаць як след якую-небудзь ідэйку альбо правесці час з блізкімі. Умацоўвай іх берагі, каб яны не зніклі ў бязмежным моры інфармацыі.

 

Фота на галоўнай by Can Dagarslani

КАМЕНТАРЫ (2)

тур
тур | 20.03.2018 02:45

А яшчэ такія ж відавочныя топы будуць? Ці рэдакцыя нарэшце зразумее, што чытачы не зусім ужо бездапаможныя дурні?

fyz
fyz | 25.03.2018 08:35

не всем это может быть очевидно,
остальным не мешает и напомнить)

КАМЕНТАВАЦЬ