8 чэленджаў на восень

Самы распаўсюджаны чэлендж, да якога звычайна прыходзіш у двух выпадках. Калі тусоўкі праходзяць за тусоўкамі, некаторыя падзеі памятаюцца праз тытунёвую смугу, а ў табе ўключаецца аўтапілот на кожным свецкім раўце. Тады ты разумееш: трэба папусціцца і сербануць упарадкаванай рэальнасці. Аднак звычайна гэта хутка праходзіць, і ты вяртаешся з новымі сіламі ў сяброўскі дзвіж.

Другі выпадак – калі табе злёгку за трыццаць, тваё жыццё здабывае канкрэтныя абрысы, штодзённую палітру якой разбаўляюць духмянае чырвонае ці цёмнае. Адмова ад алкаголю пры такіх абставінах вяртае крыху былога спрыту і жадання быць у тонусе. Тут ужо альбо ты прымаеш правілы сацыяльнага астракізму і становішся бліжэй да ЗЛЖ, альбо вяртаешся ва ўтульныя абдымкі вечароў. З кампаніяй ці без.

 Да чаго прыводзiць:  да ЗЛЖ, перспектыўных думак, адзіноты

Яшчэ адзін чэлендж, з якім сутыкаецца сучасны прасунуты чалавек. Правесці месяц у цнатліва чыстым афлайне хочацца пасля таго, як пачынаеш пакутаваць ад няспыннага маніторынгу стужкі і страху прапусціць нешта важнае (так званы сіндром FOMO).

У першыя дні чэленджа эксперыментатар звычайна адчувае прыліў сіл ад вызваленага часу, але ўсё гэта – толькі эфект навізны. Неўзабаве ты знойдзеш чым запоўніць яго: заліпнуць на серыяльчык па ТБ, упіцца ў кнігу або развучыць сем жыццёва важных марскіх вузлоў (мы не адмаўляем, што некаторыя з гэтых відаў дзейнасці больш карысныя, чым сацсеткі). Так ці інакш, пасля належнага тэрміну чалавек разумее, чым сацсеткі па-сапраўднаму каштоўныя: атрымаць прапанову папрацаваць над новым праектам і не прапусціць аб'яву аб эксклюзіўных паказах чылійскага кінематографа магчыма, хутчэй за ўсё, менавіта там. А калі табе хочацца на некаторы час выпасці з руціны, з сацсеткамі ці без, ты знойдзеш як гэта зрабіць.

 Да чаго прыводзiць:  да разумення карысці сацсетак, лёгкага стаўлення да анлайн-баталій, жыццёвай разнастайнасці

Чэлендж для суровых духам. Звычайна яго абвяшчаюць, каб паказаць (сабе, у асноўным), што нашы звычкі і запатрабаванні ўмоўныя, і чалавек вольны выбіраць, што яму сапраўды трэба, а ад чаго можна адмовіцца, прыдумаўшы, як гэта здабыць, зрабіць ці вырасціць самастойна.

Тут таксама ёсць два варыянты развіцця падзей: месяц скончыцца, ты адчуеш, якая ты крутыха, і дазволіш сабе адзначыць гэтую падзею, выдаткаваўшы палову папярэдняга бюджэту. Альбо працягнеш разумець, што лішнія выдаткі табе на фіг не патрэбныя, і паступова прыйдзеш да фрыганства, соды замест мыла і гародзіка поўнага забеспячэння.

 Да чаго прыводзiць:  да знаходлівасці, да меркавання, што «так жыць нельга», да лявацкіх перакананняў

Чэлендж для тых, хто ўсё жыццё лічыў сябе дохлым вусенем, а апынуўся мускулістай мурашкай. Пасля першых заняткаў тваё цела раптам ператвараецца ў змолаты на мясарубцы супавы набор. Аднак з цягам часу ты здзіўляешся, што цягліцы пружынняцца ад энергіі, ты заўсёды бадзёры(-ая) і за любую справу бярэшся з непадробнай лёгкасцю. А яшчэ праз некаторы час ты раптам разумееш, што можаш прабегчы паўмарафонскую дыстанцыю. Як гэта адбылося, напрыклад, з былой шэф-рэдактаркай 34travel Настай Ерохай. І, як паказвае вопыт, пасля 30 дзён твой спартыўны азарт толькі пачынае разгарацца.

 Да чаго прыводзiць:  да бадзёрасці духу і яснасці розуму

Калі ты хочаш абнавіць свае музычныя густы, якія засталіся ў недапітым келіху шампанскага на студэнцкім выпускным і вераломна падтрымліваюцца магнітолай у тачцы, то гэты чэлендж дазволіць скараціць дыстанцыю паміж незразумелай моладдзю і тваім «залатым стандартам». Рэч у тым, што шлак як выпускаўся 15 гадоў таму, так і выпускаецца цяпер (і ён таксама застаецца папулярным). Але выходзіць шмат іншай класнай музыкі, якая не крычыць пра сябе з кожнай шаўрмічнай. Яе трэба знаходзіць. Па рылэйтах, прыслухоўваючыся да парадаў ці ўласнага нюху. І табе зноў будзе што абмеркаваць з сябрамі. Напрыклад, куды коціцца The Knife і чым так файныя апошнія рэлізы DJ Shadow.

 Да чаго прыводзiць:   да дапытлівасці

Яшчэ адзін матывуючы чэлендж. Калі ты адчуваеш, што штодзённыя перамяшчэнні гравіруюць выразную траекторыю на карце твайго жыцця, то гэты чэлендж дадасць некаторай ружы вятроў на яе. Новы дзень – новае месца ў горадзе, няхай гэта будзе зацішная набярэжная, новы барчык або дах у «спальніку». Другі варыянт: новы дзень – новае гарадское мерапрыемства. І калі ты з Менска, то зарулівай да нас у тэлеграм-канал, дзе мы нязмушана даводзім, што Minsk Not Dead.

 Да чаго прыводзiць:  да навакольнага свету

Адзін з самых складаных чэленджаў. Змяняе жыццё настолькі, што праз месяц можаш знайсці сябе, напрыклад, у індыйскім ашраме, удзельнікам мальтыйскай рэгаты або з пераламанымі косткамі ў фаніпальскай падваротні. Без хлусні застаецца спадзявацца толькі на ўдачу.

 Да чаго прыводзiць:  да непрадбачаных жыццёвых сітуацый

З ныццём усё проста. Даўно пара завязваць. І да гэтага больш не вяртацца. Ты здзівішся, што свет рухаецца наперад, а не захрасае ў зубах, як вараная кукуруза.

 Да чаго прыводзiць:  да здаровага ладу жыцця