34mag

Праклён Гедройца

12.10.2016
Аўтар: 34mag
5265

Сёлета прэмія Ежы Гедройца праводзіцца ўжо чацвёрты раз. Тут спрачаюцца не за сусветную вядомасць і невычэрпнае прызнанне, а хутчэй за тое, каго намінальна назавуць лепшым сярод роўных. Каму ўручаюць, якая галоўная інтрыга і колькі грошай дадуць прызёрам – коратка пра галоўную падзею белліту.

Літаратурная прэмія імя Ежы Гедройца заснаваная ў 2012 годзе. Прысуджаецца за лепшую кнігу прозы ў папярэднім годзе на беларускай мове. За мінулыя гады пераможцамі станавіліся Павел Касцюкевіч, Уладзімір Някляеў, Ігар Бабкоў і Віктар Казько.

Дзе і калі адбудзецца ўручэнне?

Сёння, 12 кастрычніка, у гатэлі Renaissance (пр. Дзяржынскага, 1Е) а 19-й. Прыйсці можа кожны.

Хто прэтэндуе на прэмію?

Андрэй Адамовіч «Таўсьціла і лешч»

Валянцін Акудовіч «Прачнуцца ранкам у сваёй краіне»

Альгерд Бахарэвіч «Белая муха, забойца мужчын»

Алесь Пашкевіч «Рух»

Таня Скарынкіна «Шмат Чэслава Мілаша, крыху Элвіса Прэслі»

Макс Шчур «Завяршыць гештальт»

Што атрымаюць пераможцы?

За трэцяе месца даюць двухтыднёвы творчы адпачынак у Берлінскім літаратурным калоквіуме, за другое – творчую стыпендыю ў Доме творчасці пісьменнікаў у Швецыі. Галоўны ж прыз – € 5000. Дарэчы, памер прэміі ўрэзалі ў параўнанні з папярэднім годам удвая.

Галоўная інтрыга сёлетняй прэміі

Ці дадуць прэмію Альгерду Бахарэвічу, або журы зноў знойдзе прычыны, чаму не ў гэтым годзе? Двойчы кнігі аўтара ўваходзілі ў шорт-ліст, летась «Дзеці Аліндаркі» атрымалі трэцяе месца.

Хто выступіць на ўзнагароджанні?

Раман Падаляка, акцёр Купалаўскага тэатра, прачытае ўрыўкі з абраных кніг, гурт Shuma адыграе два музычныя сэты для гасцей.

Як падаць свой твор на наступную прэмію?

Працэс адбору не такі складаны. Для гэтага дастаткова напісаць зварот у Беларускі ПЭН-цэнтр, далучыць 6 асобнікаў сваёй кнігі – і гатова: тваё стварэнне ў спісе намінаваных. Сёлета ў ім было 29 аўтараў. Пасля фільтр доўгага спісу, а затым журы абірае шэсць выданняў, якія трапляюць у шорт-ліст. Заключны этап – выбар трох пераможцаў.

Чаму мы пра гэта пішам?

Прэмія Гедройца – найбольш значная літаратурная прэмія Беларусі, якая паволі, але штурхае літаратурны працэс у краіне. «Бясспрэчны плюс прэміі – яе незалежнасць ва ўсіх сэнсах, – гаворыць Сяргей Дубавец, пісьменнік, сябра журы і намінант леташняга Гедройца. – Мы не звяртаем увагу на ідэалогію, палітыку ці рэгаліі аўтара, а проста намагаемся аб’ектыўна ацаніць сучасную літаратуру».