10 праграм, каб навесці парадак з грашыма

 

 

Monefy – простая апка, якая дапамагае адсочваць «грашовыя патокі». Націскаеш на плюс – фіксуеш прыбытак, мінус – выдатак. Ёсць магчымасць асобна кантраляваць аперацыі кэшам і па карце, платная версія ўмее ў мультывалютнасць. Таксама ў платнай версіі можна дадаваць уласныя катэгорыі выдаткаў з рэлевантнымі іконкамі, але і ў бясплатным варыянце катэгорый звышдастаткова.

З Monefy будзе лёгка зразумець, на што больш за ўсё сыходзіла грошай у месяц ці за год і дзе палягае твая асабістая «чорная грашовая дзірка». Тыя, хто атрымліваюць сродкі з розных крыніц, аб'ектыўна ўбачаць, якая з гэтых крыніц больш паўнаводная. А яшчэ тут можна абраць розныя рэжымы адлюстравання рахунку – на выпадак, калі хочацца бачыць пераходны астатак або трымаць перад вачыма свой бюджэт.

 

 

Апка, якая шчодра прапануе кучу опцый бясплатна – давядзецца толькі пацярпець рэкламныя банеры. Апроч адключэння рэкламы, даплаціць прапануюць за безліміт акаўнтаў і выкарыстанне дэсктопнага менеджара, але, шчыра, для асабістага фінменеджменту гэта ўзровень «гуру».

У Money Manager ёсць абсалютна ўсё, што патрэбна для кантролю грашовых плыняў. Можна рабіць асобныя «скарбонкі» для кэшу, банкаўскіх картак, запазычанасцяў, інвестыцыйных рахункаў і іншага; заводзіць безліч дэталёвых катэгорый для апісання сваіх выдаткаў; наладжваць напаміналкі пра рэкурэнтныя плацяжы; аналізаваць усё на прыгожых дыяграмах; абіраць прыемную каляровую тэму і нават асобна вызначаць, якога колеру будзе ў цябе галоўная панэлька.

 

 

Забяспечвае кантроль за ўсімі тваімі рахункамі, ці тое банкаўскія акаўнты або крыптавалютныя гаманцы. Праграму можна падлучыць да іх – і Spendee будзе аўтаматычна фіксаваць транзакцыі, так што не спатрэбіцца ўручную заносіць кожны піражок з крамы ля дома. Забіваць аперацыі ручкамі прыйдзецца толькі ў тым выпадку, калі карыстаешся гатоўкай. Аднак калі цябе насцярожваюць розныя сінхранізацыі з банкамі, то можаш запісваць уручную ўсё – працуе і так.

У Spendee ёсць опцыя ўсталёўваць абмежаванні па розных артыкулах выдаткаў, каб не спускаць больш, чым хацелася б. Таксама ёсць функцыянал для тых, хто хоча падсабраць грошай на нейкую мару. А яшчэ пры жаданні можна завесці сумесныя рахункі для пары, сям'і ці кватарантаў.

 

 

Апка, якая зберагла не адно сяброўства. Splitwise дапамагае лёгка падлічыць, хто і колькі каму вінен, калі нехта аплачваў агульныя рахункі ў рэстаране ці недзе яшчэ. Гэта незаменная штука ў групавых падарожжах, бо не даводзіцца ствараць нататкі пра агульныя выдаткі на ежу, таксі, бензін або апартаменты, а потым усё гэта віртуозна калькуляваць. У Splitwise вы проста ствараеце групу пад вашу сітуацыю і ўносіце рахункі, а ўся калькуляцыя будзе зробленая за вас, прычым амаль у любых валютах.

Таксама праграму паважаюць тыя, хто здымаюць разам жыллё, ці сем'і, якія не жывуць з агульнай скарбонкі. І гэта, натуральна, ратавалачка для тых, хто часта дае ці бярэ ў доўг.

 

 

Класная праграма для парачак. У Honeydue вы зможаце не толькі кантраляваць агульныя выдаткі, але і камунікаваць наконт плацяжоў ва ўбудаваным чаце. Шмат хто з карыстальнікаў цэняць апку менавіта за гэты чат, які дазваляе ўсе размовы вакол грошай згрузіць у адно месца і потым, калі што, хутка адшукаць патрэбныя звесткі і інфармацыю.

Але можна выкарыстоўваць апку не толькі для парных выдаткаў, але і для асабістага фінансавага ўліку – ты сам(-а) выбіраеш, што для партнёра(-кі) будзе бачным, а што не. Ёсць опцыя лімітаў з напамінальнікам аб тым, што вы да іх набліжаецеся. Аб плацяжах па крэдыце або аб выплатах страхавой кампаніі Honeydue умее нагадваць таксама. Але калі табе трэба праграма, каб ставіць фінансавыя мэты і адсочваць, як прасоўваюцца справы з іх дасягненнем, то гэта не зусім яно.

 

 

Дапамагае планаваць плацяжы. Сюды можна заносіць плацяжы, што паўтараюцца, і ўключаць напаміналкі, каб своечасова пакласці грошы на тэлефон ці інтэрнэт, аплаціць страхоўку, набыць падарункі, працягнуць абанемент у фітнэс-клуб, заданаціць нейкім добрым рабятам і гэтак далей. Таксама ў Bills Monitor можна сартаваць абавязковыя плацяжы па катэгорыях і адсочваць у календары, якія выдаткі ў цябе на носе. За пару даляраў можна паставіць версію Pro з дадатковымі фічамі.

На абедзвюх платформах праграма з гэтай назвай выглядае просценька, але ў Google Play ты рэальна ўспомніш світанак андроідаўскага дызайну (плюс гэта ці мінус – вырашаць табе).

 

 

Ва ўсіх у сматфонах жывуць гэтыя кашалькі, але варта прыгледзецца да іх лепей, бо гэтая штука файная не толькі як сховішча плацежных карт, але і як віртуальная кішэня для карт лаяльнасці, купонаў, клубных карт, квіткоў, лічбавых ключоў і іншага. Калі не ленавацца закідваць гэта ўсё ў Wallet, то, па-першае, не даводзіцца цягаць з сабой дысконтныя карткі, якімі карыстаешся раз на год, а па-другое, не прапускаеш магчымасць зэканоміць, калі гэтае «раз на год» нарэшце здараецца.

 

 

Актуальна для тых, хто фрылансіць у Літве. Дапамагае трымаць у парадку даходы і выдаткі ІП, умее выстаўляць інвойсы і праварочваць анлайн-плацяжы. А яшчэ DeepFin калькулюе падаткі згодна з літоўскім заканадаўствам. Праграма выкарыстоўвае штучны інтэлект і навучаецца ў працэсе. Узровень бяспекі даных заяўлены як для прадпрыемстваў, то-бок высокі.

 

 

Гэтая праграма ў першую чаргу для тых, хто хоча адсочваць грашовую плынь у межах рабочай каманды (і гэтыя фічы платныя), але заадно яе можна выкарыстоўваць для асабістай бухгалтэрыі. З фішак – скануе чэкі і здабывае інфармацыю з іх аўтаматычна; а яшчэ Expensify прапануе палічыць выдаткі на бензін, абапіраючыся на GPS-дадзеныя па маршруце. Увогуле, шмат наваротаў, якія камусьці пададуцца абсалютна залішнімі, затое нейкія камандныя справы гэтая апка дапаможа паставіць на паток.

 

 

Гэтая праграма не пра грошы, але можа дапамагчы закрываць некаторыя пытаннечкі з імі своечасова і нават з задавальненнем. Habitica створаная для таго, каб матываваць сябе ўмацоўваць добрыя звычкі і радзей паддавацца дрэнным. Тут ты заводзіш персанажа і, прапампоўваючы сябе ў сваіх мэтах, прапампоўваеш гэтага аватара. Можна засінхроніцца з сябрамі, каб аб'яднаць намаганні на шляху да лепшых версій сябе.

У праграму можна заносіць задачы, якія паўтараюцца (напрыклад, плацяжы па рахунках), аднаразовыя to-do (вярнуць пазыку своечасова), але галоўнае тут – фіксацыя добрых і дрэнных звычак, якія могуць быць звязаныя і з грашыма. Напрыклад, можна пстрыкаць на мінус кожны раз, калі шопінг у масмаркеце стаў крыніцай лёгкага дафаміну, і на плюс – калі атрымалася ўтрымацца ў рамках тыднёвага бюджэту (ці проста заахвочваць сябе за тое, што фіксуеш маніфлоў у адной з апак, якія былі пералічаныя вышэй)

Любы коўч скажа, што частка грашовых праблем крыецца ў стылі жыцця і звычках. Дык вось, Habitica дапаможа прынамсі выявіць прабоіны ў лодцы твайго фінансавага дабрабыту – і, магчыма, задумацца над тым, што з імі можна зрабіць.