- ЧЫТАЦЬ ПА-БЕЛАРУСКУBEL
- READ IN ENGLISHENG
Увага! На «Першаку» пачынаецца раздача новага міні-альбома Sumbur ад лірычнага рэпера Лёні Пашкоўскага. Гэтым разам наш атлант Pashkowski расправіў плечы і выдаў вельмі ёмкае музычнае выказванне, з гранічна дапушчальнай шчыльнасцю метафар і надрыўным унутраным настроем.
Лёня працягвае адкладваць ікру перад публікай невялічкімі легкатраўнымі порцыямі. Фармат пяцітрэкавага альбома ўжо становіцца яго фірмовым стылем – уявіце, музыка, дыскаграфія якога складаецца з адных эпішак! І гэта не расчароўвае, бо артыст вельмі ўдала ўпакоўвае свае піражкі. Цеста ў самы раз, а ўсё астатняе – сытная, вострая, шматынгрэдыентная начынка, ад шэф-повара, які выступае за самадастатковасць кожнай стравы і, здаецца, цягнецца да высокай кухні.
У прынцыпе, вокладка вельмі ўдала ілюструе канцэпт, настрой і напаўненне альбома. Гэта нешта сярэдняе паміж гімнамі адзіночкі і фірмовай энігмай ад Пашкоўскага. Артыст пасталеў, як любяць казаць старпёры. Пасталеў, але не супакоіўся – Sumbur амаль цалкам прысвечаны пошукам. Пошукам кахання, гармоніі, сэнсаў, пытанняў, адказаў, сілаў, сябе. І гэтую пошукавую экспедыцыю, як і многія іншыя, таксама заносіць снегам, залівае дажджом і часам засмоктвае ў пясок.
Нас шчыра радуе тое, што ёсць на свеце такі брацішка Pashkowski, які шукае сябе і час ад часу выстрэльвае душэўнымі міні-альбомчыкамі, што адчайна трапляюць у настрой.
Attention! We're starting to distribute a new mini-album “Sumbur” (“Confusion”) from lyrical rapper Lenya Pashkowski. At this time, our atlas Pashkowski shrugged and made a very capacious musical statement with the maximum allowable density of metaphors and hysterical inner mood.
