Wasp’n’Hornet Wasp’n’Hornet

Мікалай Старажук

аўтар музыкі:

– Гэты альбом асабіста для мяне значыць вельмі шмат. У першую чаргу, гэта манумент нашаму з Віталікам сяброўству. Я вельмі рады, што менавіта з ім мы запісалі гэтую плытку. Па-другое, гэты рэліз даў мне магчымасць выйсці за межы студыйнай працы і паспрабаваць сябе ў якасці канцэртнага музыкі. І гэта крута! Плюс да ўсяго гэта амаль цэлы год майго жыцця, і ў песнях застануцца найлепшыя ўспаміны ды эмоцыі. Здаецца, што гэты альбом – пачатак новага этапу майго жыцця.

Віталь Сідарук

вакаліст, аўтар відэа гурта:

– Адна частка альбома пра тое, што мудаком быць дрэнна, другая – пра тое, што прыстойным быць добра. Мне здаецца, усе маюць прыкладна аднолькавыя ўяўленні пра дабро і зло. І вось калі нехта робіць дрэнна, ён гэта добра разумее, але ўсё роўна робіць, бо для яго мэта важнейшая за сродак. Такі чалавек у нашым разуменні і ёсць самы натуральны мудак. Таму наш альбом нясе ў сабе выхаваўчае зерне. Гэта такі здзек з усяго, што мы лічым убогім. І захапленне ўсім, што мы лічым дабрадзейнасцю.

Аляксандр Бергер

прадзюсар, крэатыўны дырэктар лэйблу Thankyou.ru:

– Я даўно знаёмы з Віталікам Сідаруком – ведаў яго як таленавітага мультыплікатара, аўтара некалькіх відэа для «Ляпісаў». Аднойчы я ўбачыў кавалак пластылінавага кліпа, які Сідарук зняў, як мне падалося, для нейкага моднага англійскага гурта. А потым я даведаўся, што спявае ў гэтым гурце сам Віталік, дый базуецца гурт не ў Манчэстэры, а ў Менску. Мне адразу спадабалася музыка хлопцаў, і калі яны прапанавалі мне супрацоўніцтва, я ні хвіліны не сумняваўся, што гэта вартая справа.