Музычнае відэа зняў малады  рэжысёр Міша Пархоменка   з  Wind Studio , які ўжо адзначыўся некаторымі рэкламнымі ролікамі, кароткаметражнымі фільмамі і кліпам. Міша ўбачыў рэліз Tempo Bay на «Першаку», яму вельмі спадабалася, таму ён вырашыў напісаць музыкам у дырэкт. Яму было цікава зняць кліп за ідэю, каб проста падтрымаць малады гурт. Забаўна, што ў гэты ж час музыкі таксама думалі пра кліп і шукалі, хто мог бы яго зняць. Так усё і супала.

Ідэя кліпа цалкам належыць Мішы, Tempo Bay унеслі толькі некалькі сваіх дапаўненняў у сюжэт. Ад абдумвання ідэі і да яе рэалізацыі прайшло каля чатырох месяцаў, на самі ж здымкі, у якіх у цэлым было задзейнічана 17 чалавек, спатрэбіліся два дні. Выніковы бюджэт кліпа склаў каля $1000. Гэта з улікам таго, што шмат хто з удзельнікаў здымак працаваў за сімвалічную плату (альбо наогул бясплатна), таму што ім спадабалася ідэя і было цікава ўнесці свой уклад.

Ігар Булаш з Tempo Bay трохі праясняе дэталі сюжэта: «Гангстару-меламану патрэбны быў гурт, які б выканаў песню так, як ён яе чуў. І аказалася, што гэты гурт – вядома ж, Tempo Bay: нездарма ў фінале відэа на "праслухоўванне" прыводзяць Мікіту – нашага вакаліста. Яму ўдалося выканаць усё так, як хацелася гангстару-меламану. Развіваючы гэтую тэму, нават можна сказаць, што гэта жартоўная гісторыя стварэння гурта, маўляў, яе сабраў той самы грозны гангстар-меламан».

У бліжэйшых планах Tempo Bay – як мінімум прыняць удзел у фестывалях-конкурсах  Emergenza  і  Viva Braslav Muz Open . Таксама яны маюць намер паўдзельнічаць у якім-небудзь усходнееўрапейскім шоукейс-фэсце і зняць якаснае live-відэа. Найбліжэйшы канцэрт, дарэчы, –  28 студзеня ў Doodah King . Гэта першы адборачны тур фестывалю Emergenza (Tempo Bay граюць прыкладна а 21-й).