Інструментал напісаў вядомы менскі электроншчык Deech, частка тэксту належыць аўтарству невядомага паэта, а жаночую партыю запісала выкладчыца вакалу з роднага горада Вожыка.
Па словах Вожыка, жаданне запісаць фолк-рэп кампазіцыю для «Еўрабачання» з'явілася ў яго яшчэ шэсць гадоў таму. Дапамагаць у стварэнні музыкі тады вызваўся гурт Shuma, але штосьці не зраслося, і ідэя адклалася на доўгі час. Пазней, капаючыся ў архівах Сенненскага дома культуры (Сянно – родны горад Вожыка), рэпер выпадкова знайшоў лісточак з напісаным ад рукі тэкстам невядомай фальклорнай песні. Гэта і паслужыла адпраўной кропкай для напісання трэка.
«Для таго, каб зрабіць дэмку, я пачаў шукаць дзяўчыну ў пару. Я заўважыў, што ў нас у Сянно вельмі крутая выкладчыца ў музыкалцы, спявае класна, трымаецца на сцэне. Падумаў, дай з ёй дэмку зраблю, а потым ужо як пакаціць. І што вы думаеце? Запісалі, я скінуў Deech-у, і мы вырашылі, што нам ніхто не трэба, пакідаем яе», – распавядае Вожык у інтэрв'ю «Нашай Ніве».
Жаночыя партыя ў песні належыць 20-гадовай Яне Прусаковай. Дзяўчына працавала па размеркаванні ў сенненскай музычнай школе, а цяпер паступіла ў магілёўскую кансерваторыю.
Аўтарам інструментала стаў электронны музыка і бітмэйкер Deech, вядомы таксама па сваёй працы з гуртамі «ЛСП» і Shuma. Музыкант з'яўляецца даўнім сябрам Вожыка і таксама нарадзіўся ў горадзе Сянно.
З нагоды таго, што фолк-рэп на беларускай мове можа апынуцца нефарматам для еўрапейскага конкурсу, Вожык не хвалюецца: «На мінулым “Еўрабачанні” нарвежцы выконвалі амаль рэп і занялі высокае месца. Lordi таксама выйгралі, а яны нефармат. Заўсёды выйграе той, хто адрозніваецца, таму этна-рэп тут выгадна выглядае».
