Лявон Вольскі выпусціў новую версію песні «Толькі для цябе»
Сёння, 23 сакавіка, у пятую гадавіну смерці Ганны Вольскай (1976-2016), Лявон Вольскі выпусціў абноўленую версію балады «Толькі для цябе», якую ён напісаў падчас і пад уплывам падзей Плошчы-2006.
Новае жыццё і гучанне баладзе музыка дадаў разам з нарвежскім саўнд-прадусарам Сннорэ Бэргерудам.
Вольскі ўспамінае абставіны, ў якіх была напісаная балада: «Была халодная вясна 2006-га. Улады зруйнавалі намётавае мястэчка на Плошчы, па тэлевізары паказвалі няўцямную прапаганду, у якую, здавалася, нармальны чалавек не паверыць, канцэрты былі пад забаронаю. Мы з Ганнай езьдзілі на Акрэсьціна – падняць баявы дух палітвязьняў. Дарылі кружэлкі, касэты, кнігі – што маглі. А перад тым, як "яны" разабраліся з Плошчаю, прыяжджалі туды, да Палаца прафсаюзаў, штовечар – сьпявалі з пратэстоўцамі песьні, рабіліся часткай вялікага здаровага арганізму Плошчы насуперак шэрай хваравітай рэчаіснасьці».
У сваім фэйсбуку Лявон Вольскі піша, што нягледзячы на сваю навізну «Толькі для цябе» вяртае яго ў 2006-ы, у момант, калі ён разам з жонкай стаяў на Плошчы.
Ганна Вольская была музычным прадусарам. Яна памерла ад анкалагічнай хваробы.
