Гурт «Разбітае сэрца пацана» выпусціў альбом «Ашчушчэнія», матэрыял для якога збіраўся даволі доўга (з «Карняплодаў любві» мінула аж тры гады). Музыкі кажуць, што ў выніку атрымаўся разнапланавы альбом пра нас – нашы страхі, надзеі, перажыванні.

Бесклапотныя трэкі «Брукі з выпускнога», «Пьяны тарыф», «Супер мадам» з’явіліся ў бесклапотныя часы, а пасля лета 2020-га «РСП» дадалі сацыяльнай вастрыні, выдаўшы «Бег» і «Серый квадрат», чым толькі замацаваліся ў пуле важнейшых музычных гуртоў краіны.

Запісывалі «Ашчучшэнія» ў Менску, да таго, як частка саставу з’ехала ў Кіеў пасля адміністратыўных «сутак». Нагадаем, што ў лютым на канцэрце гурта пад Смалявічамі артыстаў разам з гледачамі затрымаў АМАП. Увесь квартэт – Дзяніс Тарасенка, Павел Гарадніцкі, Андрэй Осіпчык і Аляксандр Кавалёў – атрымаў 15 сутак арышту.

Дзяніс Тарасенка, вакаліст

«"Ашчушчэнія" – альбом-рэфлексія. Тыя падзеі, што адбываліся з намі і краінай цягам апошняга года, успаміны дзяцінства, і, канешне ж , каханне – усё гэта адлюстравалася ў песнях. Па гучанні і настрою альбом атрымаўся разнастайны, сакавіты, шмат увагі надалося гучанню вакалаў. Бадай што ў кожнай песні слухачы знойдуць нешта сваё, асабістае, што зрэзаніруе і кране, бо тыя рэчы, аб якіх спяваецца у песнях “РСП”, не абмінаюць ніводнага чалавека».

Альбом ляжыць на стрымінгах і чакае сваіх слухачоў.