Papa Bo Selektah зладзіў вулічны сэт у Познані
Беларускі дыджэй і прадзюсар Papa Bo Selektah прайшоўся цэнтральнымі вуліцамі Познані з энергічным паўгадзінным сэтам.
Маршрут невыпадковы: ён падсвечвае беларускую прысутнасць у польскім горадзе. Першыя біты гучаць каля Fundacja KUT, далей шлях ляжыць праз Barak Kultury і Plac Wolności, завяршаецца рухомая дыскатэка каля бара My pod Sceną, дзе выступалі шматлікія артысты, якіх ты любіш (6 лістапада там будзе спяваць Palina). Кожны пункт маршруту – месца, звязанае з беларускім кантэкстам ці адкрытае да супрацы з нашай супольнасцю.
Аднаўляючы серыю сваіх вулічных DJ-сэтаў, Papa Bo Selektah імкнецца паказаць, што «беларуская культура працягвае гучаць і развівацца там, дзе ёсць людзі, гатовыя слухаць і спрыяць адно аднаму». Фармат відэа-дыджэй-сэтаў часта падсвятляе канкрэтныя лакацыі (вось, напрыклад, Ólafur Arnalds разам са сваім бэндам падсвятляе чароўную прыгажосць Ісландыі). У выпадку перформансаў Papa Bo Selektah сэнс яшчэ і ў тым, каб кантактаваць з аўдыторыяй: горад, выпадковыя мінакі і музычны арт выступаюць тут сутворцамі.
