Шоукейс-фэст Music Week Poland запрашае артыстаў з Усходняй Еўропы
26–29 чэрвеня ў Варшаве ўпершыню пройдзе шоукейс-фестываль Music Week Poland. Гэта выдатная магчымасць заявіць пра сябе – у тым ліку для беларускіх артыстаў і артыстак, бо, у адрозненне ад іншых польскіх шоукейс-фэстаў, гэты не засяроджаны на лакальным кантэксце.
На Music Week Poland адбудуцца жывыя выступы, канферэнц-сесіі, адукацыйныя мерапрыемствы. На івэнт завітаюць прадстаўнікі музычнай індустрыі і медыйшчыкі з розных кутоў Еўропы. Арганізатары заяўляюць падзею як «браму для польскіх і ўсходнееўрапейскіх артыстаў, праз якую можна выйсці на дынамічныя еўрапейскія музычныя рынкі».
Ад творцаў, якія хочуць выступіць на Music Week Poland, чакаюць кароткую бія, спасылку на стрымінгі, дзе можна паслухаць іх музыку, фота, тэхнічны райдар і дадатковую інфу. Крытэры адбору – мастацкая якасць, арыгінальнасць, сугучнасць фестывалю.
Дадатковыя пытанні можна задаваць па адрасе contact@musicweekpoland.com. Заяўкі прымаюць да 20 сакавіка на сайце фэсту.
Нагадаем, што і сусветна вядомы бэнд Molchat Doma некалі выступаў на утульным шоукейсе ў Менску.
