Галоўная мэта праекта Arsis Nova – акумуляваць варушняк у сферы беларускай акадэмічнай музыкі праз выкананне і запіс сачыненняў кампазітараў(-ак), якія амаль не гучаць, праз арганізацыю магчымасцяў для таленавітых беларускіх творцаў у краіне і за мяжой, а таксама праз асветніцкія імпрэзы і жывое ўзаемадзеянне з аўдыторыяй.

Нядаўна ініцыятыва заявіла пра сябе, выклаўшы першы рэліз пад назвай «Hidden Place | Secret Life»: пад вокладкай – чатыры творы двух сучасных беларускіх кампазітараў, запісаныя камерным аркестрам з больш чым дваццаці беларускіх музыкаў.

Альбом, па словах стваральнікаў, ёсць музычнай рэфлексіяй на нашу сучаснасць, спробай асэнсаваць калектыўны эмацыйны досвед апошніх гадоў і зафіксаваць наяўную рэчаіснасць. «Hidden Place | Secret Life» – гэта разважанне аб тым, што такое дом: і як фізічная прастора, і як прастора ўнутры нас, у якой адбываецца наша шчырае эмацыйнае жыццё.

Паслухаць рэліз і парэфлексаваць пад музыку можна па спасылцы. Сачыць за навінамі праекта – у Facebook.

Таксама ініцыятыва Arsis Nova распачынае цыкл жывых музычных спатканняў у Варшаве пад назвай «10 недарэчных пытанняў да дырыжора». Падчас імпрэз Іван Касцяхін пад акампанемент струннага ансамбля будзе распавядаць пра ўсё, што ты хочаш ведаць пра акадэмічную музыку, але баішся спытаць.

Першая сустрэча адбудзецца 9 лістапада а 19-й гадзіне ў Старамейскім доме культуры, у самым сэрцы Старога горада. Калі ты ў Варшаве і пакуль не маеш планаў на доўгі суботні вечар – раім зазірнуць. Уваход вольны.