Выйшаў новы альбом Лявона Вольскага «Гравітацыя»
Жывы класік беларускай сцэны вярнуўся са сваім пятым альбомам.
Лявон Вольскі выпусціў альбом «Гравітацыя», свой першы рэліз за тры гады. Гэта ўсё тыя ж песні Вольскага пра людзей і свет вакол іх, за якія мы яго і палюбілі. З нечаканага – «Руская песня», дзе Лявон упершыню за 30 гадоў заспяваў на рускай мове.
«Гравітацыя» завяршае трылогію, распачатую плыткамі «Грамадазнаўства» (2014), «Псіхасаматыка» (2016). Як і гэтыя рэлізы, ён быў запісаны ў Вільні з нарвежскім музыкам Снорэ Бергерудам. Сродкі на запіс «Гравітацыі» Лявон збіраў праз краўдфандынг – і паспяхова закрыў усю суму.
Прэзентацыя альбома «Гравітацыя» пройдзе ў Prime Hall 2 сакавіка. Абяцаюць і новыя песні, і лепшыя хіты з сольнай творчасці і гуртоў, у якіх удзельнічаў Лявон. Квіткі – ад 40 BYN, шукай на Kvitki.by, Primehall.by і ў гарадскіх касах.
Лявон Вольскі:
– У гэты дзень хачу найперш падзякаваць усім, хто падтрымаў краўдфандынг, – для мяне гэта неацэнна. Канцэпцыя альбома – гісторыя чалавечага жыцця, ад нараджэння і да скону, з прывязкай да пэўнай тэрыторыі. Спачатку юнацкі максімалізм, мары, летуценні, першае каханне, а потым пачынаецца пераход у дарослы час, калі шмат што не спраўдзілася ды яшчэ сістэма ўрываецца ў тваё жыццё і бязбожна яго рэдагуе. А потым ужо сталасць, калі сыходзяць сябры і людзі вакол, трэба падводзіць вынікі. Шмат у чым невясёлыя.
