Запрашаем на лекцыю пра медыя і закон

Рубрыка: УЛОЎ
21.09.2018
Аўтар: 34mag
11376

4 кастрычніка ў .PUNKT адбудзецца лекцыя адваката Сяргея Зікрацкага «Лепш не трэба: як пазбегнуць праблем, працуючы ў медыя?». Калі ты нейкім чынам сутыкаешся з медыя і марыш, каб табе менш прылятала ад чыноўнікаў, герояў матэрыялаў ды радавых чытачоў, то гэты івэнт прапускаць нельга, нават калі на вуліцы лясне мароз пад мінус 30°С.

Эксперт у праве раскажа пра найбольш распаўсюджаныя памылкі, якія можна зрабіць, калі працуеш у беларускім медыяасяроддзі. Ніякай вадзіцы! Усе тэмы будуць асвятляцца на прыкладах з яго адвакацкай практыкі, так што даведаешся пра чужыя граблі і ўжо на іх не наступіш. А граблі ўласныя, хутчэй за ўсё, абыдзеш.

Хто такі Сяргей Зікрацкі?

Адвакат, 39 гадоў. Больш за 17 гадоў працуе з беларускімі медыя, фатографамі, рэкламным і інтэрнэт-бізнэсам. Сярод кліентаў – Onliner.by, Citydog.by, Kyky.org, БелаПАН ды іншыя беларускія медыя, рэкламныя агенцтвы, дызайнерскія студыі.

Сяргей кожны дзень разрульвае пытанні, звязаныя з абаронай аўтарскіх правоў, карыстальніцкімі пагадненнямі на сайтах, негатыўнай рэакцыяй чытачоў, пазовамі і прэтэнзіямі да медыя. І гэта, канешне, далёка не ўсё, на чым ён сабаку з’еў. Адным словам, профі.