34mag

Віртуальная экскурсія па выставе *SCAPE

28.07.2017
Аўтар: Violetta Savchits
7434

У галерэі культурніцка-адукацыйнага цэнтра ЦЭХ з 6 ліпеня ідзе выстава *SCAPE – пра мікс класічнага пейзажа і сучасных тэхналогій. Напярэдадні пераадкрыцця мы завіталі на экскурсію з мастакамі і мастачкамі і зафіксавалі першапачатковую кампазіцыю. На выставе мы пачулі, як падае камень, убачылі, як выглядаюць хаос і ўніверсальны далягляд, а яшчэ пашукалі сувязь паміж відэа з агляднай пляцоўкі і відэа са спадарожніка. Мы не супраць, калі ты ўбачыш і пачуеш штосьці іншае. Ідзі і глядзі!

Што?

*SCAPE – мастацкі праект. У яго аснове – тэма пейзажа і спалучэнне з сучаснымі тэхналогіямі. Медыумы самыя розныя: інтэрмедыяльныя інсталяцыі, камп’ютарныя генераваныя выявы, відэамапінг, сяміканальная аўдыяінсталяцыя – цэлы спектр.

Хто?

Ян Кромбгольц, Іва Поланэцка, Францішак Пэхачак, Карым Тарак’і, Паліна Хаценка – мастакі і мастачкі, якія вучацца ў Чэхіі ва ўніверсітэце Яна Евангеліста Пуркіне ў горадзе Усці-над-Лабэм.

Навошта ісці?

Паглядзець на спарадкаваны хаос, пачуць падзенне каменя, убачыць універсальны далягляд, 3D-пейзаж і знайсці сувязь паміж крохкім і манументальным відэа.

Віртуальная экскурсія

Хаос і парадак

Чэшскі мастак Карым Тарак’і восем гадзін фіксаваў, як статычны прамень лазера адлюстроўваецца ад ньютанаўскай вадкасці. Гэта ўсё прыводзіцца інфрагукам у нестабільны стан. У выніку маем «фотаздымкі» некантраляванага руху часціц. Такі сабе спарадкаваны хаос.

Гарызонты

Гэта праца Івы Поланэцкі, якая фіксавала ў дарозе далягляды. У выніку атрымалася мноства здымкаў, якія складаюцца ў адзін асабісты гарызонт. Гэта далягляд усіх даляглядаў, якія яна калі-небудзь бачыла. Глядзі, як хутка рухаюцца здымкі і ўтрымліваюць усе гарызонты, адкрытыя мастачкай.

Падзенне

Ян Кромбгольц і Паліна Хаценка зафіксавалі падзенне каменя. Мастак і мастачка зрабілі аўдыязапіс у чэшскім нацыянальным запаведніку Сваташске скалы і ператварылі яго ў сяміканальную аўдыяінсталяцыю.

Рэльеф

Гэта аб’ёмны 3D-пейзаж, які складаецца з бясконцай колькасці магчымых кампазіцый. Аўтар працы – Францішак Пэхачак. Па сутнасці гэты твор – рэакцыя на творчасць мастакоў-пейзажыстаў эпохі рамантызму, асабліва на працы Каспара Давіда Фрыдрыха. Многія мастакі эпохі рамантызму стваралі свае працы паводле апісання краявідаў у кнігах. Францішак Пэхачак таксама стварае няісныя віды і ландшафты, толькі не ў плоскасці палатна 2D, а ў 3D.

Трэцяя пазіцыя

Праца Паліны Хаценка – два відэа: манументальнае са спадарожніка і крохкае з агляднай пляцоўкі. Гледачу застаецца толькі інтэрпрэтаваць па-свойму.

SCAPE 1.1. Пераадкрыццё

У нядзелю 30 ліпеня а 19-й адбудзецца пераадкрыццё выставы і прэзентацыя новых прац: з’явяцца новая сяміканальная аўдыяінсталяцыя Яна Кромбгольца і відэаінсталяцыя «Манумент». У праграме яшчэ кароткі тур па выставе і музычны сэт. Не прапусці!

Уваход на пераадкрыццё бясплатны.

Выстава працуе штодзень з 12:00 да 21:00 па 24 жніўня ў ЦЭХу (вул. Кастрычніцкая, 16)

Кошт квітка – 4 руб. Ільготны – 2 руб.

Візуал by Віялета Саўчыц