Зусім нястрашнае «Страшное дело»

Рубрыка: РЭПОРТЫ
01.07.2019
Аўтар: 34mag
4896

29 чэрвеня ў галерэі «Ў» было «Страшное дело»: моладзевы адукацыйны цэнтр «Фіяльта» ладзіў фестываль пра страхі актыўных і неабыякавых. Тут можна было паслухаць моцных людзей, якія гэтыя самыя страхі пераадолелі, падзяліцца сваімі болькамі, а яшчэ даць фобіям рашучы бой, сплясаўшы сіртакі або зрабіўшы абстрактны калаж.

У «Пакоі страху» ментарылі пра тое, як не баяцца публічных выступаў і арганізацыі івэнтаў, як шукаць аднадумцаў і збіраць грошы на сваю ідэю. У «Дворыку жахаў» самазабыўна варкшопілі, нэтворкалі і танцавалі. Атмасфера была такой жвавенькай, што можна з упэўненасцю сказаць: быць дзейным і самаадукоўвацца – гэта ў нас сёння модна.

Калі сцямнела, надышоў час Fuck Up Night: актывісты браліся за мікрафон і сумленна дзяліліся гісторыямі сваіх правалаў. Рэзюмаваць сказанае можна было б трыма слайдамі з прэзентацыі Ніка Суворава, заснавальніка «Кінаклуба 451F»: «Як падняць аднаму сем ініцыятыў за два гады і застацца ў жывых?» – «Ніяк». – «Але вы можаце паспрабаваць».

Калі ласка, спрабуйце. А мы будзем пра вас распавядаць.