Loftas Fest 2017 – гайд па урбан-фестывалі*

  • 04.09.2017
  • Аўтар: 34mag
  • 7981

 

8–9 верасня ў Вільні адбудзецца шосты штогадовы фестываль Loftas Fest*. Гэта адзіны фэст у краінах Балтыі, які аб’ядноўвае ў адной індустрыяльнай прасторы 4 музычныя сцэны, аўдыявізуальныя перформансы і інсталяцыі, выставу сучаснага дызайну і фэшн-маркет, кінапрагляды і канферэнцыю. Каб ты не згубіўся(-лася) у насычанай праграме мерапрыемстваў, пройдземся па асноўных тэматычных прасторах Loftas Fest.

 

Сам клуб Loftas знаходзіцца ў цэхах былога завода радыёэлектронікі і вядомы беларусам канцэртамі гуртоў «Ляпис Трубецкой» і «Крамбамбуля». Навінка сёлетняга фестывалю ў тым, што ён будзе падзелены на дзве зоны – платную і бясплатную. Наведвальнікі змогуць свабодна тусіць на трох музычных сцэнах, дзе выступяць літоўскія і замежныя артысты, у «Адкрытай галерэі», на фэшн-маркеце (які, дарэчы, будзе працаваць усю ноч) і ў кінатэатры. У гэтай жа зоне ты знойдзеш вялікі выбар стрыт-фуду і «барны бульвар». Квіткі спатрэбяцца толькі для таго, каб трапіць непасрэдна на Loftas Main Stage* унутры клуба, дзе будуць граць хэдлайнеры.

 

 

 

 

 LOFTAS MAIN STAGE* 

 

Арганізатары фестывалю ўпарта абмінаюць гучныя імёны і вышукваюць найбольш цікавыя экзэмпляры сучаснай музычнай індустрыі. Сёлета не выключэнне – на Loftas Main Stage* выступяць, магчыма, не самыя знакамітыя артысты, але яны з вялікай верагоднасцю разнастаяць твой плэйліст на год наперад.

 

 

 

Mykki Blanco

Мікі Бланка – трансгендарная і мульцігендарная пісьменніца, актывістка і перфарматыўная мастачка. У 2010 годзе першай пачала ствараць індастрыял-панк пад псеўданімам No Fear, пасля чаго стартанула Riot Grrrl відэа-арт-праект – улетку 2016, у час перадвыбарчай кампаніі ў ЗША, па сацсетках пракацілася яе кранальнае відэа, дзе Мікі чытае верш «I Want A Dyke For President» («Хачу лесбійку ў прэзідэнткі»). У 2015 годзе Mykki ў кааперацыі з !K7 стварае свой уласны лэйбл Music Group, які ставіць мэтай даць голас андэграўндным артыстам(-кам), якія падзяляюць яе бачанне і «выходзяць за рамкі традыцыйных культурных межаў / канструктаў».

 

 

 

 

Lindstrom

Бацька нарвежскага спэйс-дыска Ханс-Петэр Ліндстрэм прадставіць слухачам праграму са свайго новага EP Windings – дынамічнага, інтэнсіўнага і асвяжальнага.

 

 

 

 

PAULi.

Чалавек шматлікіх абліччаў – PAULi. aka Паўлі Лаўджой – музыкант з уражальным рэзюмэ. Толькі пачаўшы кар’еру, ён паспеў пасупрацоўнічаць з Дэйманам Албарнам у праектах Gorillaz Sound System і The Heavy Seas, а ў 2014 стаў музыкальным рэжысёрам FKA TWIGS і Jamie XX. На фэсце ён прэзентуе праграму са свайго дэбютнага EP – The Idea Of Tomorrow.

 

 

 

Акрамя таго, на галоўным стэйджы выступяць электронна-этнічны дуэт з Ізраіля Echo & Tito, літоўскі авангардны рэп-перформер Mesijus, адзін з выдатных літоўскіх прадзюсараў Deep Shoq, дасведчаная тэхна-дыджэйка расійскага паходжання Anna Hanna і іншыя. Усё гэта за сімвалічныя для такога лайнапу € 13-15. Але сумаваць не давядзецца і на астатніх трох сцэнах.

 

 

 

 

 

 EUROPAVOX* 

На адкрытай пляцоўцы Europavox* сыграюць музыканты з болей чым 10 еўрапейскіх краін: рэперы Úlfur Úlfur (Ісландыя), мультыінструменталіст Noiserv (Партугалія), твой знаёмы па FSP NOËP (Эстонія), vonKuusk (Эстонія), Black Oak (Нідэрланды), фры-джаз праект EZERI (Латвія), ba. (Літва), Solo Ansamblis (Літва), Mōrk (Венгрыя).

Каб трапіць на стэйдж, не забудзь націснуць “Пайду” ў івэнце ў фэйсбуку.

 

 

 

 

 WHAT’S NEXT IN MUSIC?* 

 

Гэта не проста сцэна, але і штогадовая прафесійная канферэнцыя і невялічкі шоукейс. Сёлета прамоўтары, прадзюсары, музычныя журналісты і самі артысты абмяркуюць інавацыі ў індустрыі, сучасныя практыкі і звычкі слухачоў, будучыню музычнай журналістыкі, дадуць парады па вытворчасці музычных відэа і эфектыўным выкарыстанні YouTube, пазіцыяванні сябе на лакальным і міжнародным рынках. Увечары 8 і 9 верасня адбудуцца шоукейс-выступы маладых перспектыўных музыкантаў самых розных жанраў. Сярод іх зноўку апынуліся і беларусы. Тайтлы ад нашай краіны – Senary і Awlnight. Кампанію ім саставяць Sheep got waxed (Літва), Timid Kooky (Літва), Deeper Upper (Літва), Bandmaster (Латвія), SillyCut (Літва), jautì (Літва), Meandi (Літва), Melvitronica (Шатландыя).

Удзел у канферэнцыі бясплатны, але неабходна зарэгістравацца па спасылцы. Расклад і падрабязнасці шукай у фэйсбук-івэнце.

 

 

 

 

 BURN Techno stage* 

 

Для аматараў тэхна два дні з 22:00 па 6:00 будзе гудзець асобны стэйдж з удзелам тузіну лакальных дыджэяў: Roudtraxx, Tylios Naktys, Double Top, Muddy Waters, Efcology, Kemran, Doctah Haus, Jack Krass, Alex Krell, Mist, Tamsis (Live), Narti.

Паслухаць іх міксы можна на старонцы фэсту.

 

 

 

 

 Галерэя мастацтва Open Gallery* 

 

Падчас фэсту ў былы прамысловых цэхах і катакомбах будзе працаваць цэлая галерэя з удзелам літоўскіх і замежных мастакоў: інсталяцыі, скульптура, стрыт-арт, кіно і тэатральныя перформансы – тут ты абавязкова знойдзеш натхненне для сваіх будучых работ. Джэнтрыфікаваць завод працягнуць мясцовыя мастакі разам з выпісанымі адмыслова на фэст шведам DIRTYELMO (SWE) і аўстрыйцамі BOICUT (AUT), чыімі працамі ўпрыгожаныя Лондан, Маямі ды Берлін. А французскі архітэктар і ландшафтны дызайнер Guilaume Herr-Zekanowski (aka  RZK.MKS) зладзіць інсталяцыю, якая мусіць патлумачыць, як прыстасаваць шэры горад да новага ладу жыцця. Натхніўся(-лася) Vulica Brasil? Руш у Вільнюс даганяцца.  

 

Спіс артыстаў шукай тут.

*Лофтас Фэст, Лофтас Мэйн Стэйдж, Еўропавокс, Уотс нэкст ін мьюзік?, Бёрн Тэхна Стэйдж, Оупен Гэлеры

ООО «Ирвинга группа»
УНП 191751509