Miensk Coffee Festival

  • 03.05.2017
  • Аўтар: 34mag
  • 2

 

15–22 траўня ў фотагенічным інтэр’еры ENZO адбудзецца Miensk Coffee Festival – своеасаблівы «тыдзень адкрытых дзвярэй» для каваманаў. За восем дзён праз барную стойку пранясуцца восем лепшых абсмажчыкаў і кавярань Менска, кожны са сваёй традыцыяй запарвання і зернем. Разгортваем праграму фэсту на старонках 34mag.

 

Miensk Coffee Festival – гэта васьмідзённы кававы калейдаскоп, спроба пазнаёміць аматараў з лепшымі дасягненнямі кававай хвалі, якая накрыла Менск некалькі год таму. А заадно і форум ведаў, дзе праз напоі лепшыя барысты горада распавядуць пра свае апошнія вынаходніцтвы.

 

 

 

Як усё будзе выглядаць?

Кожны дзень гатаваць каву будуць новыя кавярня ці абсмажчык з уласнымі кавамолкай і зернем. Адзін з барыстаў становіцца на класічную каву, другі – на альтэрнатыву. Кожную раніцу перад адкрыццём – 15-хвілінная лекцыя для персаналу на тэму, якое зерне запарваецца сёння, якім чынам і які смак атрымаецца ў кавы. Гэтыя веды цягам дня афіцыянты(-ткі) будуць прапаноўваць наведнікам разам з тым ці іншым кававым мастэрпісам.

 

   Улад Луневіч, саўладальнік ENZO, «ДЭПО», «Лаўкі»:

– Рэстаратары ў Менску зрэдку паміж сабой камунікуюць, у тым ліку і ў кававым свеце. Кожны сам за сябе, усе адно аднаму канкурэнты. Таму мы ўсіх збіраем хоць і ў розныя дні, але на адной афішы.

Мы не профільная кававая ўстанова, але ў нас ёсць пляцоўка. З-за той атмасферы, якая пануе на Кастрычніцкай, у нас і такі фармат: дэмакратычны, лёгкі. Адпаведна, і госці ў нас гатовыя да размовы, ім можна прапаноўваць новае. Дзе, як не на Кастрычніцкай, людзі гатовыя да эксперыментаў?

 

Чаму менавіта гэтыя ўдзельнікі?

Улад: Зараз не так шмат кавярняў. Бум на каву быў 1,5-2 гады таму, і тыя, хто быў слабейшы, або тыя, хто адкрывалі кавярні, таму што лічылі, што кава – гэта круты бізнэс, зачыніліся. Мы рэальна не ўзялі дзве ці тры кавярні, якія, на жаль, не праявілі ініцыятывы.

 

Навошта яшчэ адзін кававы фэст?

Улад: Іншыя фестывалі выглядалі хутчэй як спаборніцтва паміж аксакаламі. Мы ж арыентуемся на наведнікаў, пры гэтым у натуральным асяроддзі – кавярні. Чалавек прывык піць капучына або чорную каву з малаком. А калі ты яму прапануеш: «А пакаштуй яшчэ вось гэта», у яго пачынае пашырацца кругагляд, мазгі варочаюцца трохі па-іншаму. Здаецца, гэта дробязь, аднак гэта наш уклад у развіццё культуры ў цэлым.

 

 

 

Праграма фэсту:

 

15 траўня – «Мануфактура»

Хто гатуе? Вераніка Наджафава і Уладзіслаў Юнцэвіч

Што гатуюць? Гватэмальскі мікралот El Morito, эфіопскую Natura Seyanote Gr.1 і гандураскую Finca La Bendiction, усё ў сухой апрацоўцы

16 траўня – SORSO di espresso

Хто гатуе? Ігар Ліопа і Кацярына Варакса

Што гатуюць? Фірмовую сумесь з арабік, эфіопскую Harrar Gr.3 Kubsitu і кенійскую Kangunu AA

17 траўня – Surf Coffee

Хто гатуе? Дзіма Якімаў і Сяргей Галавач

Што гатуюць? Сумесь сальвадорскай El Molinito і кастарыканскай Tarrazu Tucan, кенійскую Kamuhuma, руандскую Ngoma і эфіопскую Yiergacheffe

18 траўня – «Зерне»

Хто гатуе? Вольга Белановіч і Арцём Гвоздзь

Што гатуюць? Эфіопскую Deridawa натуральнай апрацоўкі, бразільскую Mogiana сухой апрацоўкі і кенійскую Gichathaini абсмажвання Таццяны Елізаравай з маскоўскай Happy Roasters

 

19 траўня – 26

Хто гатуе? Аляксандр Шачко і Каценька

Што гатуюць? Эфіопскія Alemtena Gr.1 і Aramo Gr.1 і бурундзійскую Gakenke

20 траўня – Kitchen Coffee Roasters

Хто гатуе? Яўген Пінчукоў і Міхась Цюхцяеў

Што гатуюць? Кенійскія спэшлці Endebess і Rungeto

21 траўня – Seadog Coffee Roasters

Хто гатуе? Юля Кофі і Арцём

Што гатуюць? Сальвадорскую арабіку El Molino, кастарыканскую Tarrazu і эфіопскую Yirgacheffe Gr 1 Biloya

22 траўня – Knot Coffee Roasters

Хто гатуе? Даша Пінчук і Віталь Фільмановіч

Што гатуюць? Сальвадорскую El Molino і эфіопскую Harrar, усё натуральнай апрацоўкі

 

Miensk Coffee Festival пройдзе з 15 па 22 траўня ў кавярні ENZO. Шукай івэнт у Facebook. Падрабязней пра менскія кавярні глядзі ў дасканалым гайдзе ад 34travel.

 

 


КАМЕНТАРЫ (2)

крэк
крэк | 2017-05-03 20:27:35

імя барыста з "дабл б" антоній, а не антоніа: https://www.instagram.com/shkrabaanthony/

34mag.net | 2017-05-03 20:40:57

Які базар, зараз паправім

КАМЕНТАВАЦЬ