Song Under The Bridge Sasha Ilyukevich

Сёння на мультылэйбле «Пяршак» свой новы альбом Songs Under The Bridge раздае Саша Ільюкевіч – наш чалавек у Лондане. Не так даўно мы распавядалі цікавую эмігранцкую гісторыю простага хлопца з вёскі Янавічы Клецкага раёна, які з’ехаў на Брытанскія выспы, каб скалаціць свой бэнд і скарыць англійскую сталіцу. Ніжэй ты можаш праслухаць і спампаваць тое, што ў яго атрымалася.

Творчасць Сашы Ільюкевіча нам падаецца вартай увагі менавіта з-за альтэрнатыўных славянскіх матываў і адгалоскаў, якія ён, магчыма падсвядома, уплятае ў свой фірмовы замежны гук. Вельмі цікава сачыць за тым, як музыка, кардынальна змяняючы каардынаты пражывання і свой асяродак, працягвае несці ўнутры сябе нейкія культурныя коды і матывы на ўзроўні ДНК і цягліцавай памяці. Свежы запіс эксперыментальнага эмігранцкага праекту прасякнуты шыкоўным рэспектам васьмідзесятым: ад вакальнага цытавання Віктара Цоя да рэчытатыўнага паклону ў бок Майка Навуменкі. Усё гэта густа замешана на моцнай творчай энэргетыцы самога Сашы і яго дзіўнай манеры адчуваць наваколле, што робіць матэрыял лепшай аўтарскай плыткай зімняга сезона. Як мінімум беларускага.