Прэзентацыя сінглу: Rostany – China

31.01.2018

74975

Прадстаўляем тваёй увазе свежы сінгл ад беларускай электрахаўс-банды Rostany, якая ўсе свае кікі, дропы і бэйслайны грае жыўцом. Трэк «China» – гэта гісторыя пра тое, што цябе чакае ў Паднябеснай, калі ты адважышся завярнуць за рог вуліцы.

Гурт стварыў экс-лідар электрарокавай каманды Dali Віктар Рудэнка ў 2012 годзе, да якога ў далейшым падцягнуліся бубнач Сяргей Кучынскі і клавішнік Альберт Красноў. Rostany неаднаразова ўдзельнічалі ў беларускіх тэлевізійных праектах: саўндтрэк да «Дзіцячага Еўрабачання», намінацыя «Песня года» на «ОНТ» і інш. У 2015-м хлопцы адправіліся ў сямімесячны тур па Кітаі, у 2017-м – паўтарылі авантурны ваяж на 40 гарадоў. Маюць LP «Copy-Paste Me», кліпы на «Daisy Chain» і «When People Dance». Сёння прадстаўляем іх новы трэк «China».

Вакаліст Rostany Віктар Рудэнка пра рэліз:

– Гісторыя песні рэальна звязаная з Кітаем. У самым пачатку туру з-за кандыцыянераў я жорстка захварэў, а трэба было спяваць. Пасля першых двух канцэртаў звязкі сышлі ў нуль, і мы пачалі шукаць клініку, дзе робяць заліўку і ўкол кальцыем, пасля якіх ты, здаровы і дужы, далей спяваеш. Адразу мы трапілі ў гарадскую бальніцу, дзе мне пасля шматлікіх працэдур і марнавання кучы грошай паведамілі, што проста трэба месяц маўчаць. Як высветлілася, у афіцыйных клініках Кітая адмовіліся ад такіх экстранных метадаў. Тады мы прымаем рашэнне ісці ў падпольны шпіталь, дзе адбываецца сапраўдны Кітай: абшарпаныя сцены, хворыя ў брудных халатах, мне жудасна, што яны мне там уколюць. Якраз у той момант і з'явіліся першыя радкі гэтай песні: «China, you make me fucking nuts, you make me full of coming of motherfucking drugs». Гэта стала зачэпкай, якую мы адразу ж у гатэлях і пачалі афармляць у песню. Праўда, скончылі ўжо ў Беларусі толькі ў кастрычніку, бо эксперыментавалі з 40 версіямі аранжыровак. Гісторыя ў шпіталі, дарэчы, скончылася хэпі-эндам: укалолі, што трэба.

Далей музыкі рыхтуюць кліп на новую песню «Fuck Me Harder», якую здымаў малады рэжысёр Міша Пархоменка (літаральна на мінулым тыдні мы рэлізілі яго музычнае відэа для Tempo Bay). Больш пра гастрольны тур па Кітаі «Ростаней» можна пачытаць тут.

Rostany у сеціве: