Беларускі бітмэйкер Plushka выпусціў новы альбом «PAD 3 (EP#15)».

«PAD 3 (EP#15)» – гэта дзесяць няспешных кампазіцый у стылі лоўфай бітс, здольныя наладзіць на збалансаваны, удумлівы настрой для падарожжа па знешнім ці ўнутранным свеце. Альбом выйшаў на лэйбле Radio Plato.

Plushka – пра рэліз:

– Назва «Pad 3» – ад вялікай любві да сэмплявання і проста да лічбы 3. На гэтай плытцы я хацеў перадаць галоўным чынам настрой і свае пачуцці. Думаю, гэта робяць усе музыкі: субліміруюць сваё нутро ў гукі. І калі гэта па-сапраўднаму, тады гэта адразу адчуваецца. Спакойны, вясёлы, месцамі меланхалічны альбом.

У адным з трэкаў ёсць голас маёй бабулі. Бывае, мы не бачымся вельмі доўга, і калі я вяртаюся ў Беларусь, я ёй тэлефаную. Адзін з такіх момантаў трапіў на дыктафон, а пасля і ў гэты альбом.

Таксама на плытцы багата гітарных партый. Гэта мая любімая схема: засэмпляваць што-небудзь, а потым найграць сваю гітару ці бас. Раней я скептычна ставіўся да сэмплявання, пакуль не зразумеў, што спосабаў карыстання гэтай тэхнікай нашмат больш, чым можна падумаць першы раз.

І па старой завядзёнцы, тут ёсць дыялогі з савецкага кіно. Раней я часта рабіў такія прыёмчыкі, бо люблю савецкае кіно па сваёй натуры  і чуць, як прыгожа ў ім гавораць людзі.

Паслухаць рэліз можна на ўсіх стрымінгах. Падтрымаць музыку можна праз Bandcamp.