Пасля двух разагрэвачных сінглаў, якія анансавалі моўныя змены («Квант» і «Жыццё як жах»), з’явілася жменя трэкаў, што рэфлексуюць на тэму размытай будучыні і маніфестуюць жаданне выстаяць. «Жыццё як жах» займела новую, адрозную ад сінглавай версіі аранжыроўку, «Дэдлайн» працягвае традыцыю класічнага гуку гурта, а «Катастрофа» аказалася нечаканым электронным эксперыментам. Самі музыкі называюць «Суперпазіцыю» поп-альбомам, хоць па-за новымі павевамі прыхільнікі ўсё яшчэ могуць знайсці пост-панк з фірмовым шчыльным гітарным шэрагам.

 

 

«Суперпазіція» на ўсіх папулярных стрымінгах – па спасылцы. Набыць альбом і падтрымаць гурт капейчынай можна на Bandcamp. 

 

Ілля Чарапко-Самахвалаў:

– У пэўны момант у [маім] жыцці з'явілася шмат людзей, якія размаўляюць па-беларуску ў паўсядзённым жыцці. А калі з табой размаўляюць на мове, якую ты хоць як-небудзь разумееш, вельмі цікава адказваць на ёй жа, у меру сваіх магчымасцяў. У выніку ты пачынаеш адчуваць яе мелодыку, і ў цэлым стаўленне да мовы змяняецца. А пасля з’яўляецца жаданне зрабіць тое, чаго ты яшчэ не рабіў: прыдумаць поп-музыку на беларускай мове. Ты робіш адну песню, потым з’яўляюцца людзі, гатовыя табе ў гэтым дапамагчы, і вось з'яўляецца альбом.

Я думаю, што аматары правіл знойдуць некаторыя недакладнасці, але нас у першую чаргу цікавіла мілагучнасць, якая надае важкасць, здавалася б, вельмі простым фразам. Ды і я лічу, што памылкі робяць мову жывой. Тым не менш мы, вядома, бясконца звярталіся да слоўніка, хоць памылкі, напэўна, дзесьці ўсё роўна дапусцілі. Але не ў гэтым сутнасць. Гэта даніна павагі да мовы, якая незаслужана доўгі час была аб'ектам пагарды. Для нас гэта эксперымент, і прыемна, што гэта эксперымент менавіта з беларускай мовай.

Тэмы звычайныя: вера, надзея, любоў, расцярушаныя па патэльні дэпрэсіі. «Нешта добрае» з'яўляецца лейтматывам цяперашняга жыцця ўвогуле, як механізм процідзеяння страху, болю і энтрапіі.

Усё запісвалася адначасова і ў адным месцы: на ўскрайку аднаго небезвядомага старога горада, куды мы ўсе з'ехаліся, каб папрацаваць разам, крыху, мякка кажучы, занепакоеныя абвастрэннем тагачаснай сітуацыі дома. Таму нерв, боль, стомленасць і ў той жа час непахісная ўпэўненасць у тым, што трэба рухацца далей, каб не даць сябе з'есці, перапляліся ў гэтым запісе ў моцную жылу канцэптуальна звязаных музычных нумароў.

 

Праз пару тыдняў гурт выправіцца ў тур з прэзентацыяй новай кружяэлкі. Расклад:

 

  Квіткі – на сайце petliatour.com.

 

Тэкст: Алёна Варанец. Фота: Iван Смаляр