«Мечта» запрашае на бясплатны рэйв і канфу для клубнай індустрыі
27 верасня рэйв-тусоўка «Мечта» і грамадскае аб’яднанне «Позитивное Движение» ладзяць канферэнцыю для клубнай супольнасці. Да ўдзелу запрашаюць арганізатараў івэнтаў, арт-дырэктараў, дыджэяў, культурніцкіх менеджараў і ўсіх датычных.
Мэта мерапрыемства – «паказаць, якім можа быць сучасны рэйв – інтэлігентным, карысным, натхняльным, бяспечным і разам з тым поўным энергіі і драйву». «Позитивное Движение» ўжо 25 гадоў займаецца прафілактыкай ВІЧ-інфекцыі і нарказалежнасці, а таксама аховай фізічнага і псіхічнага здароўя людзей па ўсёй краіне. Сёлета каманда аб’яднала свае намаганні са славутай рэйв-тусоўкай, каб зрабіць беларускі чыл больш бяспечным для ўсіх яго ўдзельнікаў і ўдзельніц.
Праграма канферэнцыі:
18:00 – рэгістрацыя, вітальнае слова;
18:40 – панэльная дыскусія «20 гадоў прафілактыцы ВІЧ»;
20:30 – «Прафілактыка: падыходы і складанасці»;
22:00 – брыфінг з арганізатарамі івэнтаў і дыджэямі;
22:30 – музычная частка.
На індустрыяльную частку канферэнцыі патрэбна зарэгістравацца, яна будзе закрытая для шырокай публікі. А вось уваход на рэйв – вольны для ўсіх. З 22:30 да 00:00 будуць раздаваць эксперыментальную музыку. Пасля поўначы пачнецца танцавальная частка. У лайнапе – лакальныя дыджэі і прывоз: muxewei і Utah.
Падрабязнасці – у інстаграмах праектаў.
