Анастасія выканала тры песні з альбома «Alchemia»: «Was It All Worth It?», «Пустэча» і «Lilith». Для кожнай з іх былі створаныя асобая сцэнаграфія, уласнае светлавое афармленне і адмысловы макіяж.

«Alchemia» — чацвёрты альбом Рыдлеўскай, і ён адметны тым, што гэта дамашні bedroom-праект, усе кампазіцыі напісаныя, запісаныя, аранжаваныя і зведзеныя самой артысткай з дапамогай сябра-гукарэжысёра Аляксандра Карнейчука.

«Калі я пачынала пісаць песні, я наогул не разумела прадакшн, не ўмела працаваць у Ableton, бо ў мяне было ўсяго трохгадзіннае навучанне. Таму адзіным маім інструментам быў голас, — кажа Анастасія. — Цяпер, вядома, я лепш разумею прадакшн. Але я ўсё яшчэ люблю вяртацца да гэтай вельмі сырой, вельмі старажытнай часткі сябе, бо гэта найчысцейшы спосаб паказаць эмоцыю».

Свой стыль артыстка апісвае як арт-поп і цёмную электроніку, змяшаную з паганскім фолкам, і трымацца аднаго жанру яна не збіраецца: «Я люблю Nine Inch Nails — і люблю Pussycat Dolls. Люблю Radiohead і Тома Ёрка. Люблю Баха. <…> Я ведаю, што з пункту гледжання маркетынгу было б лепш трымацца аднаго жанру, але тады гэта было б непраўдай».

Фота: Gajowy Marucha