У электра-фольк-гурта Chornabrova выйшаў альбом «Coma», расповед у якім вядзецца ад імя штучнага інтэлекту. Частку грошай на стварэнне альбома сабралі праз краўдфандынг.

Стваральніцы гэтай шматслойнай музыкі – спявачка, акторка і рэжысёрка Паліна Дабравольская і музыка Кацпер Словік-Дабравольская. Рэліз паўстаў працягам спектакля «Coma», прэм’ера якога адбылася летась у Берліне. Саўнд да пастаноўкі атрымаў самастойнае гучанне і жыццё. Трэкі неабавязкова слухаць па парадку, але калі зрабіць менавіта так, то можна атрымаць дадатковую асалоду ад наратыву. Сюжэт альбома агулам такі: «Coma існуе за гранню традыцыйнай цялеснасці і досведу. Яна занураецца ў тэмы чалавека і чалавечнасці, палітыкі, капіталізму, міграцыі, Зямлі, экалогіі і сутнасці быцця. Кожны трэк – гэта гісторыя пра стаўленне Coma да чалавечага свету, нізка трэкаў аб’яднаная агульнай драматургіяй. Калі слухаць трэкі па парадку, можна назіраць, як мяняецца Coma і свет вакол яе».

Гэта трэці альбома Паліны Дабравольскі і першы для яе – на англійскай мове. У 2021-м у артысткі выходзіў беларускамоўны дэбют «Слова», следам за ім з’явілася «Sarmatyja» па творах Марыі Мартысевіч. Пра канцэптуальны складнік «Coma» можна крыху паслухаць у аўдыядоку «Каму мы патрэбныя, калі не сабе» студыі Vozera Media. Паслухаць альбом можна на папулярных стрымінгах. 

19 красавіка ў Варшаве адбудзецца паказ перформансу «Coma» ў Тэатральным інстытуце імя Збігнева Рашэўскага (Instytut Teatralny im. Zbigniewa Raszewskiego).