Цяпер у гэтай гісторыі з’явіцца сакавіты вініл: на Kickstarter запусцілі кампанію на GREENHOUSE 5 YEARS ANNIVERSARY LP: абмежаваны наклад у 300 асобнікаў, вялікая раскладная вокладка і крутое афармленне.

Акрамя вінілу, у кампаніі ёсць мерч, зроблены разам з гарадзенскім праектам MECHTA: цыянатыпіі на бавоўне і два асобныя арт-лоты – гіпсавая маска твару Эміля і вялікі жывапісны холст, напісаны спецыяльна пад рэліз.

34mag спытаў у Эміля, чаму цяпер:

«”Greenhouse” нібыта пяць гадоў, хоць гэта, вядома, умоўна. Насамрэч ён пачаўся яшчэ ў 2019-м, так што яму ўжо дзесці сем. Але гэта нагода нарэшце ўсё гэта запусціць, аформіць і зрабіць тое, пра што мяне даўно прасілі, – выпусціць “Greenhouse” на вініле. З альбомам “VHS” такая схема ўжо спрацавала, і цяпер я, па сутнасці, пракручваю яе яшчэ раз, толькі ўжо з гэтым праектам.

Мінулы год мы рыхтавалі не толькі сам рэліз, але і ўсё, што вакол яго. У кампанію ўвайшла старая гіпсавая маска з майго твару, а яшчэ я спецыяльна пад гэты запуск напісаў вялікі холст з натуры. Карацей, хацелася, каб тут было з чаго выбраць: асобна пласцінка, розныя колеры вінілу, шопер, майкі, лонгслівы і іншыя рэчы. Цяпер галоўнае – за месяц усё гэта сабраць, пасля чаго яно сыдзе ў вытворчасць. Cпадзяюся, на пачатку лета людзі атрымаюць свае замовы. Будзем рады падтрымцы, асабліва ад тых, хто слухае вініл, калекцыянуе яго або проста хоча камусьці падарыць».

Калі ты таксама пытаўся(-лася) ў Эміля, калі ўжо вініл, адказ з’явіўся. Падтрымаць рэліз і зрабіць перадзамову можна тут.