Мануал па скачках праз купальскае вогнішча

Вогнішча: асновы

Месца для святкавання варта абіраць не абы-якое, інакш – аніякай купальскай магіі. Што пасуе? Прастора каля вады, скрыжаванне ці любое прывабнае ўзвышша. Спадар Морыс Хальбвахс пацвердзіць: у калектыўнай памяці менавіта гэтыя лакалы надзеленыя асаблівай таемнай сілай.

Каб распаліць якаснае вогнішча, трэба добра патрэсці ўсю аколіцу: чым больш старызны прытарабаніш на распал, тым больш атрымаеш эндарфінаў. Залежнасць – строга ў прамой прапорцыі. Паліць можна любыя старыя рэчы. Гумовыя шыны? Ну проста мара! Для большага азарту можна памерацца аганьком з суседам.  

Распальваць вогнішча нельга проста так: пачынаць мусіш толькі па захадзе сонца. Таму, калі плануеш да начнога разгулу шліфануцца шашлычком, рабі сабе запасны ачаг.

Купальскі агонь традыцыйна запальваецца шараваннем, галінкай аб галінку. «Жывое» полымя атрымліваецца толькі так, але з цягам часу прызвычаіліся мы і да халтуры. Канешне, у параўнанні з натуральнымі метадамі сучасная запальнічка – гэта дзіцячая забаўка, але халера яго бяры – толькі б гарэла!

Унікальная магчымасць сублімаваць назапашаны за паўгода негатыў: пасярод вогнішча (па жаданні) ставіцца шост з колам на версе ці лялькай. Праўда, ёсць пэўныя гендарныя абмежаванні: саламяная лялька заўсёды ў жаночай іпастасі. Калі дагарае вогнішча і падае шост, кола пакажа на ўлюбёнца лёсу. Не пазяхай!

Рытуальныя нюансы тычацца і ўдзельнікаў. Падпальваць купальскі агонь варта найбольш паважанаму дзядулі альбо як мінімум хлопцу, які ў спрытнасці, кемлівасці і ўдаласці пакінуў сваіх сяброў дзесьці далёка ззаду.

Навошта ўсё гэта?

Цёплым вольным вечарам скакаць праз агонь карысна, бо так спужаеш усіх сваіх унутраных дэманаў. Павылазяць як міленькія.

Заадно можна праверыць на вашывасць сваіх сяброў: калі хто з іх ад гэтай атлетычнай праграмы адмовіцца (альбо папросту прызямліцца нязграбна), ёсць падставы западозрыць яго ці яе ў вядзьмарстве. На ўсялякі выпадак: каб яны дакладна не аказаліся ў замове з чортам, маеш дазвол паабліваць лёсіка купальскай вадой або сцебануць крапівой. Толькі дзеля вышэйшай мэты: зрабіць з яго/яе нармальнага чалавека.

Праз купальскі агонь праганялі дамашнюю жывёлу, каб засцерагчы яе ад паморку. Калі хвалюешся за свайго гадаванца, цягні яго за ашыйнік: будзеце ачышчацца разам. На агні прасушвалі сарочкі хворых, да яго падносілі дзяцей, што занядужалі.

Як падрыхтавацца

Па-першае, падчас патэнцыяльнага salto mortale пажадана быць цвярозым. Пасля – можна і ў разгул.

Шчыра раім табе не апранаць супердоўгіх сукенак і спадніц. Калі ты аматар(-ка) портак-клёш у лепшых традыцыях дыска, іх таксама лепей пакінуць на нейкі час у цемры шафы. Густыя і пышныя валасы, вусы, барады і бровы рэкамендуем завязваць, каб не ўзнагародзіць уласную галаву «апаснай» стрыжкай.

Пазбаўся ад гумовага абутку. У адваротным выпадку рызыкуеш насіць свае боты да канца жыцця.

Для большай упэўненасці скакун можа карыстацца шастом. Але тады, каб не ўляцець на суседняе дрэва, варта не забыцца пралічыць дыстанцыю разбегу.

Легальны допінг – падсілкаванне абрадавай вячэрай. Адразу пры агні зручна гатаваць традыцыйныя купальскія стравы: верашчаку, яешню, кулагу ці варэнікі.

Абяры для важнага моманту гераічны трэк. Напрыклад, штосьці з Brutto.

Тэхнічныя нюансы

Разлічы ідэальную адлегласць разгону. Звычайна хапае некалькіх метраў, але ўсё залежыць ад даўжыні тваіх ног, упэўненасці і, вядома, досведу.

Да пытання пра матывацыю. Памятай, што ад вышыні скачка спрадвеку залежала вышыня пасаджаных хлябоў. Калі гаварыць мовай сучаснай – зарплата. Хочаш зарабляць больш – скачы вышэй!

Кірунак для апгрэйда: паспяховы скачок – такі, калі полымя не дакранаецца да чалавека. Іскры таксама паніжаюць каштоўнасць.

Калі скокнуць тройчы, год абяцае быць здаровым, шчаслівым і ўдалым.

Увага! Калі хтосьці спатыкнуўся – будзе хварэць. Хіба толькі не трапіць носам у полымя. Калі скакун разварушыць агонь нагой, яго чакаюць сямейныя драмы. Але ёсць і добрая навіна: усё гэта лёгка можна нейтралізаваць, дзевяць раз скокнуўшы праз вогнішча і адначасова ў думках мадэлюючы пазітыўныя вобразы. Такім чынам за 9 разоў сваю фартуну можна і пагоршыць.

Бонус: каб абараніць ад вядзьмарства сваю прыгажуню, хлопцы (а пачалі гэта ўсё гамельчукі) могуць пакалыхаць яе на руках над купальскім вогнішчам. Галоўнае – не выпусціць.

Постскрыптум

Рэшткі вогнішча павялічваюць урадлівасць: можна закапаць у сваім агародзе ці пакінуць побач з грашыма. Чаму не, а што, калі сапраўды павялічацца?

Калі гульні з агнём для цябе занадта экстрэмальныя, а святкаваць хочацца, ёсць альтэрнатыўны варыянт: замест вогнішча арганізаваць сабе кучку з крапівы і скакаць вакол яе.