Удзельнікі гурта Tonqixod, які прыпыніў творчую дзейнасць увосень 2017-га, уз’яднаюцца на адзін канцэрт. Шоў адбудзецца 7 чэрвеня ў клубе «Бруге».

Штуршком для эпахальнага яднання стала перамога ў намінацыях «Лепшы альбом года» і «Лепшы беларускамоўны альбом» на ўзнагародах Experty.by. Рэкламна-інфармацыйная падтрымка вялікага сольніка – гэта галоўны прыз і ёсць.

Трэцяга траўня ў пабліках гурта з’явілася апытанка: «Сябры і ворагі, час вырашаць! Ці следаваць нам запаветам Заратуштры і ВIА "Скарпiёны" аб вечным вяртанні ды сабрацца, каб адыграць прызавы сольны канцэрт ад узнагарод Experty.by? А мо й не варта? Пішыце свае адказы ў каментарах. Дзякуй!». Vox populi пастанавіў: канцэрту – быць.

Нагадаем, што Уладзімір Лянкевіч, Максім Субач і Андрэй Аляксеенка выдалі свой другі альбом «Колер, якога няма» ў чэрвені 2017-га.

Канц «Шах і мат» ад Tonqixod адбудзецца 7 чэрвеня ў 20:00 у клубе «Бруге»  (пр. Партызанскі, 6а). Квіткі: ад 15 BYN.