Учора, акурат у Дзень роднай мовы, фіналісты «Еўрабачання» Naviband сумесна з гімнасткай Меліцінай Станютай прэзентавалі сваё прачытанне беларускай народнай песні «Рэчанька».

Удзельнікі гурта пракаментавалі выбар матэрыяла: «Мы часта выступаем за мяжой і падчас канцэртаў заўсёды расказваем пра Беларусь. Кожны раз менавіта “Рэчаньку” ў нашай версіі ўспрымаюць на ўра! Вось мы і падумалі, што абавязкова трэба яе запісаць. На адным з нашых канцэртаў прысутнічала Меліціна. Пачуўшы “Рэчаньку”, яна зрабіла вельмі прыгожы сольны нумар, з якім зараз выступае па свеце. Мы вырашылі, што гэта павінны ўбачыць і вы, нашыя слухачы, таму што сукупнасць энергіі песні і харызмы Меліціны стварае магію».

Меліціна расказвае, што ўпершыню пачула песню ўлетку, калі гуляла каля ратушы. «Рэчанька» адразу зачапіла яе, таму што трапілася вельмі дарэчы: «Некалькі месяцаў выношвала думку пра тое, што хачу паставіць нумар пад народную песню, але ўсё не тое было. А тут усё ідэальна. І вось да лістапада нумар быў гатовы, і ўпершыню быў прадстаўлены на самым прэстыжным гімнастычным шоў у Іспаніі».

Гімнастка кажа, што слухала Naviband задоўга да «Еўрабачання», а калі за мяжой яе просяць пазнаёміць з беларускай музыкай, яна называе найперш «Песняроў» і Navi.

9 сакавіка «Рэчаньку» ды іншы мёд на вуха ад Ксеніі і Арцёма менчукі могуць ужыць у Prime Hall. 2 сакавіка гурт выступіць у Віцебску, 8 сакавіка – у Горадні.