Лявон Вольскі прэзентаваў 21 песню пра беларусаў у эміграцыі
Лявон Вольскі выпусціў альбом «Emigranty». У кастрычніку музыка паезде з новым матэрыялам у тур.
«“Emigranty” – гэта эпічнае палатно, дзе апавядаецца пра новую беларускую рэчаіснасьць – масавую эміграцыю. У гэтай новай рэчаіснасьці беларусы сутыкаюцца з новымі ўражаньнямі ды эмоцыямі, з новымі праблемамі ды выклікамі, – адзначае Лявон. – Хтосьці сумуе па радзіме, хтосьці чарговым разам перажывае траўматычны досьвед знаходжаньня там, нехта спадзяецца на хуткае вяртаньне, камусьці дапамагае вырашыць праблемы са здароўем таямнічы лекар Ачуняй, некаму прывозіць неабходныя рэчы з дому чароўны перавозьнік на сваім “Фордзе Транзыце”».
Новы альбом – гэта 21 песня пра беларускае жыццё-быццё ў эміграцыі. У запісе ўзялі ўдзел Павал Мамонаў, Алесь Францішак Мышкевіч, Павал Аракелян, Ketevan, Павал Трыпуць, познаньскі хор «Сьпеўны сход» і струнная смычковая група Warsaw Freedom Orchestra.
Уласна ідэя праекта, кажа Лявон, выспявала ў яго даўно – і вось нарэшце аматары дачакаліся яе ўвасаблення на стрымінгавых пляцоўках і ў YouTube, а хутка дачакаюцца на сцэнах польскіх клубаў.
Расклад туру:
19.10 – Варшава, Proxima
23.10 – Гданьск, Drizzly Grizzly
24.10 – Познань, Pod Minogą
25.10 – Вроцлаў, Stary Klasztor
27.10 – Кракаў, Gwarek
31.10 – Беласток, 6-ścian
