Angst пра новы трэк:

– Метафара бегу для мяне – гэта адна з універсальных і самых аб'ёмных метафар, якія выкарыстоўвалі творцы за ўвесь час. А таму мне не хацелася б звужаць успрыманне слухачоў дакладнай аўтарскай трактоўкай закладзенага сэнсу (бо яе і няма). Адзначу, што тэкст куплета досыць стары, каля сямі гадоў таму напісаны, і я некалькі разоў выконваў яго ў розных трэках, калі пасавала бітло. Штопраўда, з адным адрозненнем: раней лірычны герой бег ДА некага, а зараз бяжыць АД. Мяркую, усе астатнія адсылкі ці гульні слоў кожны ў стане пазнаць самастойна, калі ўзнікне такое жаданне. Спадзяюся, нехта ацэніць і маю працу з рыфмай у гэтым куплеце.

Ідэя ж дастаць гэты тэкст з шафы і выпусціць яго на пляцоўках паўстала дзякуючы беларускаму ціктоку. Напрыканцы 2023-га акурат там розныя юзеры смешна флексілі пад мелодыю з «Прагнозу надвор'я». А ў нейкі момант я трапіў на ролік бітмейкера nmvrn, які выклаў сваю інтэрпрэтацыю гэтай мелодыі, і звязаўся з ім, каб папрасіць біт. Бо ў маім рэпе заўжды было шмат трэкаў, заснаваных на сэмплах з беларускай музыкі. Мяркуючы па нядаўняй клубнай апрацоўцы мелодыі, гэтая ідэя папросту лётала ў паветры.

Складана думаць пра паўнавартасны камбэк, каб ажно з альбомам альбо кліпам, калі трэкі часам не набіраюць і 3000 праслухоўванняў за ўвесь час. Але некалькі сумесных і сольных трэкаў чакаюць свайго з'яўлення ў бліжэйшыя месяцы. Таму любая дапамога ці падтрымка ў распаўсюдзе і стварэнні музыкі будзе матываваць рабіць штосьці яшчэ і яшчэ. Мяркую, гэта не толькі ў маім выпадку.